Den sani di Yohanisi sikiifi 4:1-54
4 Bakadati, Yesesi fusutan taki den Faliseiman yee taki a be e dopu sama moo Yohanisi. Den be yee tu taki den bakaman fi en be kon ipi moo den du fu Yohanisi.
2 Yesesi seefi á be e dopu sama, a den bakaman fi en be e dopu den sama.
3 Di Yesesi fusutan a sani ya, a komoto a Yudeya neen a daai go a Galileya baka.
4 Ma a be abi fu pasa aini Samaliya.
5 Di a waka te wan pisi, a doo wan foto aini Samaliya den e kai Sikar, di de koosube fu a pisi doti di Yakopu be gi en boi Yowsefu.
6 Na ape a wataa-peti fu Yakopu be de. Yesesi be weli bika a be waka wan langa pasi, neen meke a go sidon a sikinse fu a peti. A be de wan pisiten fu 12 yuu bakadina.
7 Wan Samaliya* uman kon ape fu kisi wataa, neen Yesesi taigi en taki: ‘Gi mi afu wataa baa.’
8 (A pisiten de den bakaman fi en be go bai nyanyan aini a foto.)
9 Neen a Samaliya uman akisi en taki: ‘Fa yu enke wan Dyu e akisi mi enke wan Samaliyasama wataa fu diingi?’ (A be taki a sani ya, bika den Dyu á be e taki anga den Samaliyasama.)
10 Ma Yesesi piki en taki: ‘Efii be sabi a gaan bun di Gadu wani gii fu soso, efuso sama na a sama di e akisi i taki “Gi mi afu wataa baa”, da a yu be o akisi en wataa, da a be o gii wataa di e gi sama teego libi.’
11 Neen a uman taigi en taki: ‘I naabi wan boketi seefi fu kisi wataa, anga ala a peti dipi, da pe yo fende a wataa di e gi teego libi?
12 I wani taigi mi taki i bigi moo wi afo Yakopu di fika a peti ya gi u? Bika na a peti ya en anga den boi fi en anga den meti fi en be e diingi wataa.’
13 Ma Yesesi piki en taki: ‘Efu wan sama diingi a wataa fu a peti ya, wataa o kii en baka.
14 Ma noiti moo wataa o kii a sama di diingi a wataa di mio gi en. A wataa ya o de enke wan peti di e gi teego libi.’
15 Neen a uman taigi en taki: ‘Gaantangi gi mi a wataa ya baa, fu wataa á kii mi moo, da a naw de fu mi e kon ya ala yuu fu kisi wataa.’
16 Yesesi taigi a uman taki: ‘Go kai i man daw kon.’
17 A uman piki en taki: ‘Mi naabi man.’ Neen Yesesi taigi en taki: ‘Ya lei, i naabi man tuu,
18 bika anga feifi man i libi paati kaba, a wan di yu anga en e libi nownow seefi a nai man. Da ya lei dii taki i naabi man.
19 A uman taigi en taki: ‘Mi si taki ya wan polofeiti tuu.
20 Na a mongo ya den gaansama fu u be e dini Gadu, ma u dati e taki a Yelusalem namo sama sa go fu dini Gadu.’
21 Yesesi taigi en taki: ‘Biibi mi, dyonson sama naw kon na a mongo ya efuso Yelusalem moo fu dini Gadu.
22 We dini wan sama di wa sabi, ma u dati sabi sama we dini, bika a den Dyu a den fosi sama di Gadu soi fa aw fii sama.
23 Dyonson a yuu o doo, meke u taki a doo kaba, di den sama di e dini Gadu enke fa a wani, o dini en anga yeye anga den tuu leli fi en. A den sama ya a Dda e suku fu dini en.
24 Gadu a wan yeye, neen meke ala sama di e dini en mu dini en anga yeye anga den tuu leli fi en.’
25 Neen a uman taigi en taki: ‘Mi sabi taki a Mesiyas e kon, a sama di den e kai Kelestesi. Di aw kon aw tyai ala sani kon a kiin gi u.’
26 Yesesi taigi en taki: ‘A mi na a Mesiyas, a mi e taki anga i ya.’
27 A be e taki anga a uman ete di den bakaman fi en daai kon baka. Den foondoo di den si ai taki anga a uman, ma nawan fu den akisi en san a be wani, efuso san den be e taki.
28 A uman fika a bungu* fi en ape neen a go aini a foto go taigi den sama taki:
29 ‘U kon luku, wan man kon ya di taigi mi ala den sani di mi du. A sa de taki neen na a Kelestesi?’
30 Neen den sama komoto aini a foto go a pe Yesesi be de.
31 Fosi den sama doo, den bakaman fu Yesesi be taigi en taki: ‘Leliman, kon nyan noh.’
32 Ma a taigi den taki: ‘Mi abi nyanyan di wa sabi.’
33 Neen den bakaman fi en bigin akisi denseefi taki: ‘Da sama sa tyai sani kon gi en fu nyan?’
34 Yesesi taigi den taki: ‘Mi nyanyan na a du di mi mu du san Gadu wani, anga a kaba di mi mu kaba a wooko di a gi mi fu du.
35 Te a pisiten fu a yali ya doo, we taki: Ete fo mun da nyanyan o lepi a goon fu koti. Ma mi e taigi u taki, u luku den goon, da wo si taki a alisi lepi kaba fu koti.
36 A sama di e koti e fende en pai, aw tyai nyanyan kon a wan. Den nyanyan di aw tyai kon a wan, a den sama di o fende a teego libi. Te a sani ya pasa, da a sama di e paandi anga a sama di e koti o piisii.
37 Neen meke wan nongo e taki: Wan sama e paandi da wan taa sama e koti. A sani ya a tuu.
38 Mi e sende u fu go koti nyanyan di wa be paandi. A taa sama du a wooko, ma a wi fende wini fu a wooko fu den.’
39 Di a uman taigi den Samaliyasama di e tan aini a foto taki Yesesi taigi en ala den sani di a du, neen omen fu den bigin biibi Yesesi.
40 Neen meke di den Samaliyasama go a Yesesi, den akisi en fu tan anga den, neen a tan ape tu dei.
41 A so moo sama bigin biibi en di den yee san a be e leli.
42 Den taigi a uman taki: ‘Fosi, a den sani dii be taigi u be meke we biibi, ma now we biibi fu di useefi yesi yee san a taki. U sabi taki na a man ya o fii libisama.’
43 Baka tu dei, Yesesi komoto ape fu go a Galileya.
44 Yesesi seefi be taki sama nai lesipeki wan polofeiti aini en eigi kondee.
45 Di a doo Galileya, den sama bali wadaa gi en bika den be si ala den sani di a be du na a fesa a Yelusalem.
46 Bakadati a go na a foto Kaana aini Galileya, a pe a be meke a wataa toon win. Wan suudati-edeman fu Kaperna-um be abi wan boi di be siki.
47 Di a man ya yee taki Yesesi komoto a Yudeya kon a Galileya, a go neen, neen a akisi en fu a sa kon deesi a boi fi en, bika a boi be siki te fu dede.
48 Ma Yesesi taigi en taki: ‘Solanga wa si gaan maiki anga gaan wonduu, u naw biibi.’
49 A suudati-edeman taigi en taki: ‘Masaa, gaantangi kon anga mi baa fosi a pikin fu mi dede.’
50 Yesesi taigi en taki: ‘I sa go a osu, a boi fii betee.’ A man biibi san Yesesi taigi en, neen a gwe.
51 Di a de a pasi e go a osu, den saafu fi en kon miti en fu taigi en taki a boi fi en betee.
52 A akisi den on ten a boi betee, neen den piki en taki: ‘A feba saka eside wan pisiten fu wan yuu bakadina.’
53 Neen a dda fusutan taki na aseefi pisiten de Yesesi be taigi en taki: ‘A boi fii betee.’ Neen meke en anga en hii osufamii bigin biibi Yesesi.
54 A disi na a du fu tu wonduu di Yesesi du di a komoto a Yudeya go a Galileya.
A maiki
^ Luku a wowtu ‘Samaliya’ na a pisi ‘San den wowtu ya wani taki.’
^ Wan goo di meke anga tokotoko.