Den sani di Yohanisi sikiifi 7:1-52
7 Bakadati Yesesi peleiki go doo aini Galileya. Aa be wani gwa Yudeya, bika den Dyu be e suku fu kii en.
2 A Masanga-fesa* fu den Dyu be koosube.
3 Neen meke den baala fi en taigi en taki: ‘Gwa Yudeya da den bakaman fii o si den gaan sani di ye du.
4 Bika efu wan sama wani taawan sabi en, a naw du sani kibiikibii. Efi ye du den sani ya, da go meke ala sama si taki ye du den.’
5 Den baala fi en seefi á be e biibi taki a Gadu sende en kon.
6 Yesesi taigi den taki: ‘A yuu fu mia doo ete. Ma u dati sa go iniiwan yuu di u wani.
7 Sama nai buuse u, ma den e buuse mi, bika mi e taigi den kiin taki a soso ogii den e du.
8 U sa go na a fesa, ma mi naw go ete, bika a yuu fu mia doo ete.’
9 Baka di a taki den sani ya, a fika a Galileya.
10 Ma di den baala fi en go na a fesa, enseefi go tu. Ma a be go kibiikibii, bika aa be wani sama si en.
11 Den Dyu be bigin e suku en na a fesa. Den be e taki: ‘Pe a man ya de?’
12 Den sama di be de ape be e taki omen sani fi en. Son wan be e taki: ‘A wan bun man.’ Taawan be e taki: ‘Noiti, a koli ai koli a foluku.’
13 Ma nawan fu den sama ya be e taki fu ala sama yee, bika den be e feele den Dyu.
14 Wan sani fu fo dei baka di a fesa bigin, Yesesi go aini a tempel neen a bigin leli sama.
15 Den fesiman fu den Dyu foondoo te neen den taki: ‘Fa a man ya du sabi a wowtu fu Gadu so? Bika aa gwa den sikoo fu u.’
16 Yesesi piki den taki: ‘Den sani di mi e leli taawan a ná fu miseefi, ma a fu a sama di sende mi.
17 Efu wan sama wani libi enke fa Gadu wani, aw sabi efu den sani di mi e leli sama a Gadu den komoto tuu, efuso a san miseefi wani mi e leli den.
18 A sama di e taki san enseefi wani, e suku gaandi gi enseefi. Ma a sama di e suku gaandi gi a sama di sende en kon, e taki a tuu. Ai du sani a wan letifasi ala yuu.
19 A ná Mosesi gi wi a Weiti noh? Toku nawan fu u nai du san a Weiti e taki. Saide u wani kii mi?’
20 Den sama piki en taki: ‘Wan takuu yeye de ai tapu. Sama e suku fu kii yu?’
21 Yesesi taigi den taki: ‘Wan kodo sani mi du, neen ala we foondoo.
22 Mosesi gi u wan weiti taki u mu besnei. A ná Mosesi seefi be meke a weiti ya, ma a den gaansama fu u fosi a ten fu Mosesi, toku we besnei* sama na a Sabadei.
23 Efu we besnei* sama na a Sabadei soso fu di wa wani pasa a Weiti fu Mosesi, da saide wi ati e boon a mi di mi deesi wan man na a Sabadei?
24 Te we kuutu sani, wa mu wooko anga san we si. Ma u mu kuutu sani a wan letifasi.’
25 Wantu fu den sama di e tan a Yelusalem taki: ‘A ná a man ya den e suku fu kii noh?
26 Da fa a waka a de a gaan peesi ya e taki sondee fu sama taigi en wan sani? A sa de taki den tiiman kon sabi taki neen na a Kelestesi?
27 Te a Kelestesi o kon, nawan sama o sabi pe a komoto. Ma u sabi pe a man ya komoto.’
28 Di Yesesi be e leli sama aini a tempel, a taigi den taki: ‘U sabi mi! U sabi pe mi komoto tu. Ma a ná miseefi sende miseefi kon ya. A sama di sende mi de tuu, wa sabi en,
29 ma mi dati sabi en. Bika neen anda mi komoto, neen sende mi.’
30 Neen den sama bigin suku fasi fu kisi Yesesi. Ma nawan fu den be poi kisi en, bika a yuu fi en á be doo ete.
31 Toku a omen sama be e biibi en. Den be e taki: ‘Te a Kelestesi o kon, u si enke aw poi du moo gaan sani moo den sani di a man ya e du?’
32 Di den Faliseiman yee san den sama e taki fu Yesesi, den anga den edeman fu den pilisite sende den wakitiman fu a tempel fu go kisi en.
33 Yesesi taigi den sama taki: ‘Mio de ya wan pisiten anga wi ete fosi mi go na a sama di be sende mi.
34 Wo suku mi ma u naw si mi. U naw poi kon a pe mio de tu.’
35 Neen den Dyu bigin akisi denseefi taki: ‘Da pe a man ya o go te da wa poi fende en? A sa de taki aw go tan anga den Dyu di e tan a den Giikisama mindii fu leli den Giikisama?
36 San a wani taigi u, di a taki: “Wo suku mi ma u naw si mi. U naw poi kon a pe mio de tu.”’
37 A lasiti dei fu a fesa, a be a moo pelensipali dei. Di a dei de doo, Yesesi opo taampu neen a taki: ‘Efu wataa e kii wan sama, meke a kon a mi da mio gi en wataa fu a diingi.
38 A wowtu fu Gadu e taki: “Wataa di e gi libi o lon komoto aini a sama di e biibi mi.”’
39 Na a yeye fu Gadu Yesesi be e taki, di a taki den sani ya. Den sama di be e biibi en be o fende a yeye ya. Ma den á be fende en ete, bika Yesesi á be fende a makiti di a be mu fende ete.
40 Son wan fu den sama di yee san a taki bigin taki: ‘A man ya na a Polofeiti di be mu kon tuu.’
41 Taawan be e taki: ‘Na a Kelestesi de ya.’ Ma son wan be e taki: ‘A Galileya a Kelestesi be o komoto?
42 Gadu buku á taki Kelestesi be o de wan bakapikin fu David noh? A ná Betlehem, a foto fu David a be o komoto noh?’
43 A so den sama bigin sitee anga denseefi fu Yesesi ede.
44 Wantu fu den be wani kisi en, ma nawan sama holi en.
45 Di den wakitiman fu a tempel daai gwa den Faliseiman anga den edeman fu den pilisite, den akisi den taki: ‘Saide wa tyai en kon?’
46 Den man piki den taki: ‘Noiti wan dei u yee wan sama taki na a fasi ya ete.’
47 Neen den Faliseiman akisi den taki: ‘A fende u koli tu?
48 U nai si taki nawan fu den Faliseiman efuso tiiman nai biibi a man ya noh?
49 A foluku ya soso, den á sabi a Weiti.’
50 Nikodeimus, wan fu den Faliseiman di be go miti Yesesi wan leisi taigi den taki:
51 ‘Enke fa a Weiti fu we soi, da fosi u kuutu wan sama u mu yee neen fosi san a du, ná so noh?’
52 Neen den taigi en taki: ‘Saide ye holibaka gi a man ya? Ya fu Galileya? Go ondoosuku Gadu buku da yo si taki nawan polofeiti o komoto a Galileya.’*
A maiki
^ Luku a wowtu ‘Masanga-fesa’ na a pisi ‘San den wowtu ya wani taki.’
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Omen fu den gaandi bukulolo koti a pisi fu Yoh 7:53-8:11 puu.
