I be sa wani ondoosuku wan toli fu Beibel fu kon sabi sani moo fini? I be sa wani kon sabi moo fini kande fu wan tekisi, wan sama, wan peesi, efuso wan taa sani di i leisi aini Beibel? Sonten yu e akisi iseefi tu efu a Wowtu fu Gadu sa poi yeepi i anga wan sani di yu e booko yu ede anga en? We, da na a bukukasi fu a kemeente i mu go.

A abi buku di sa yeepi i fu ondoosuku sani moo fini. A tuu taki u na abi ala den buku fiya di Yehofa Kotoigi meke aini u tongo, ma a bukukasi di de na a komakandaa peesi abi gaanse fu den buku ya. I sa fende omen sowtu Beibel ape, wowtu buku, anga taa buku fu ondoosuku sani. Fosi anga baka a komakandaa, da i sa go na a bukukasi fu koboloiki den buku fu ondoosuku sani. Efu wan computer de ape a bukukasi de, da a sa abi a Watchtower Library aini. A sani ya di i sa luku a computer tapu, abi gaanse fu den buku fu u. A makiliki fu suku wan toli, wan wowtu efuso wan tekisi aini.

Den sama di e holi demo na a Wi Kelesten libi anga a peleikiwooko komakandaa sa koboloiki den buku ya. I sa koboloiki a bukukasi de fu seeka gi den pisi di yu abi a komakandaa. Na a fesiman fu a Wi Kelesten libi anga a peleikiwooko konmakandaa e luku a bukukasi ya. Neen mu solugu taki den moo nyun buku fu wi de ape. A mu e seeka den poti bun tu. I sa akisi en efuso a sama di e sutudeli Beibel anga i, fu yeepi i fu fende den toli di yu abi fanowdu aini den buku ya. Ma nawan sama mu teke den buku di de na a bukukasi tyai gwe de. Wi fu wi se wani solugu den buku bun. Wi ná o sikiifi aini den tu.

Beibel e soi taki efu u wani fende „a sabi fu Gadu” da u mu suku en enke „wi e suku gudu di kibii” (Odo 2:1-5). A bukukasi fu a komakandaa peesi sa yeepi i fu ondoosuku sani moo fini.

• Sowtu sani u sa fende aini a Komakandaa peesi di sa yeepi u fu ondoosuku sani moo fini?

• Sama i sa akisi fu soi i fa i mu suku sani aini den buku fu a bukukasi?