Beibel e taki fu tu sowtu duupu manengee di e tyai faantiwowtu aini a kemeente, den „owluman anga den dinali” (Filipisama 1:1). Enke fa a gwenti de, da iniiwan kemeente abi wan tu fu den sowtu baala ya di e yeepi anga a wooko aini a kemeente. Sowtu bun wooko den dinali e du gi u?

De e yeepi den owluman. Den dinali a sama di abi taanga biibi aini Yehofa. I sa fitoow den, bika den a bunbun sama. Sowan fu den yonkuu taawan a gaansama. De e du den wooko di de fanowdu aini a kemeente. Den wooko de na wooko di den mu du anga sikin. A sani de e yeepi den owluman fu poti ala den pakisei na a leli anga a sikapuman wooko.

De e du den wooko di de fanowdu aini a kemeente. A wooko fu sowan fu den dinali a fu bali wadaa gi den sama di e kon a komakandaa. Taawan abi a faantiwowtu fu luku a pokudosu, taawan de na a bukutafaa. Sowan mu luku den moni toli fu a kemeente, efuso taawan mu soi den peleikiman pe den mu peleiki. De e yeepi seeka den sani di booko na a komakandaa peesi. Son leisi owluman e akisi den fu den sa yeepi den gaansama. Awinsi sowtu wooko den gi den dinali fu du, toku ala yuu den de kabakaba fu du den. Neen ede meke taawan mu lesipeki den.​—1 Timotiyesi 3:13.

De e tyai denseefi a wan bunfasi fu taawan mu waka a den baka. A te wan baala abi den bun manii di wan Kelesten mu abi, da de e poti en enke dinali. Te de e gi leli na a kemeente, da a biibi fu u e kon taanga. Te de e teke fesi fu peleiki, da a sani de e meke den taawan kon kisi faya fu du a peleikiwooko tu. A wooko di den owluman anga den dinali e wooko a makandii e meke de e abi piisii anga wanfasi (Efeisesama 4:16). Bakaten den dinali sa toon owluman.

• Sama a wan dinali?

• San den dinali e du fu meke sani go bun aini a kemeente?