A wowtu „pionili” e soi go a wan sama di e go a wan nyun peesi fu opo a pasi gi taawan fu den sa waka neen baka. Yesesi be de enke wan pionili tu, bika Gadu be sende en kon a goontapu fu du wan wooko di be de taanga fanowdu, anga di be o opo a pasi gi u fu u sa kon fii (Mateyesi 20:28). Leti enke Yesesi, a so den bakaman fi en aini a ten ya e koboloiki ala ten di den fende fu ’meke disipelli’ (Mateyesi 28:19, 20). Sowan fu den be abi a okasi fu du a sani di wi e kai a pioniliwooko.

Wan pionili a wan sama di e wooko tyaipi yuu. Ala den Yehofa kotoigi a sama di e paati a bun nyunsu. Tokuso yu a abi sowan di de kowownu pionili, dati wani taki de e wooko 70 yuu ala mun fu peleiki gi taawan. Somen fu den puu wan tu fu den yuu di den be e du goontapu wooko, fu go pionili. Taawan de enke spesuutu pionili fu yeepi a son peesi pe den abi peleikiman taanga fanowdu. Ala mun de e wooko 130 yuu efu moo aini a peleikiwooko. Wan pionili e piisii fu libi anga den sani di a abi fanowdu tuutuu, ai fitoow taki Gadu o gi en den sani di abi fanowdu aini a libi (Mateyesi 6:31-33; 1 Timotiyesi 6:6-8). Den sama di á poi du a kowownu pionili, efuso a spesuutu pionili wooko, sa toon yeepi pionili efu den man. Den sa wooko 30 te go miti 50 yuu aini wan mun.

Wan sama e go pionili fu di a lobi Yehofa anga taa libisama. Leti enke Yesesi, a so useefi e si taki a de fanowdu taki sama mu kon sabi Gadu anga den sani di a o du (Malikisi 6:34). Ma u sa leli den sani di o yeepi den nownow kaba. Den sani de o gi den howpu fu a ten di e kon tu. A fu di wan pionili lobi taa sama neen meke ai koboloiki en ten anga kaakiti fu yeepi den kon sabi a bun nyunsu (Mateyesi 22:39; 1 Tesalonikasama 2:8). A wooko ya e meke wan pionili biibi kon taanga, ai meke a kon moo koosube a Gadu, anga ai meke a fende tyaipi piisii tu.​—Toli 20:35.

• Sama a wan pionili?

• San meke wan sama e go du a pionili wooko?