Den Giiki buku fu Beibel e taki tyaipi leisi fu Balnabasi anga a aposteli Pawlesi. Den baala ya be de owluman di e waka e luku den kemeente aini hawten. Saide meke den be e waka a den kemeente? Den be e booko den ede tuutuu anga den baala anga sisa fu den kemeente. Moomoo anga a biibi fu den. Pawlesi taki a be wani „daai baka go luku fa ai go anga den baala fi en”. A be de kabakaba fu waka somen kilomeiti fu go gi den kemeente taanga sikin (Toli 15:36). Na a seefi sani den owluman di e waka a den kemeente, e du aini a ten ya.

De e kon gi u taanga sikin. Ibiiwan fu den kelen-owluman e waka a sowan 20 kemeente. Tu boo wan yali den e go a wan kemeente, da den e tan wan wiki anga den. Den baala ya abi tyaipi ondoofeni, neen meke u sa leli somen sani fu den anga den uman fu den tu efu den toow. De e meke moiti fu kon sabi gaanwan anga pikinwan aini a kemeente. De e angii tu fu wooko anga u aini a peleikiwooko, anga fu go anga wi a sutudi. Den owluman ya e du sikapuman wooko makandii anga den owluman fu a kemeente. Den taki di de e holi a den komakandaa, anga den gaan komakandaa e taanga a biibi fu u.​—Toli 15:35.

De e booko den ede anga ibii wan fu u. Den kelen-owluman e booko den ede anga den sama fu a kemeente, na a se fu a dini fu Yehofa. De e holi wan pikin kuutu anga den owluman anga dinali fu luku den pisi pe den meke moiti, anga fu soi den tu fa den sa du son sani moo bun. De e yeepi den pionili fu du den wooko bun, anga de e piisii fu kon sabi nyun sama di e kon a komakandaa. De e piisii tu fu yee fa den nyun wan ya e go a fesi aini a waaleiti. Ibiiwan fu den baala ya e gi denseefi fu „wooko anga wi fu yeepi u” (2 Korentesama 8:23). Wi fu u se mu soi a seefi sowtu biibi fu den anga a fasi fa de e dini Gadu.​—Hebrewsama 13:7.

• Saide meke kelen-owluman e waka a den kemeente?

• Fa i sa fende wini te den kon luku a kemeente fi i?