Den baala di e teke fesi aini a kemeente nái kisi moni gi a wooko sa de e du. Leti enke fa den be poti baala fu teke fesi di a fosi kemeente be bigin, a letiso de e poti baala di soi taki den poi teke fesi enke „sikapuman aini a kemeente fu Gadu” (Toli 20:28). Den owluman fu a kemeente a man di abi wan taanga biibi aini Yehofa. Enke sikapuman de e teke fesi aini a kemeente. „Ná anga dwengi ma anga piisii enke fa Gadu wani, ná fu di den wani fende wini a wan bidiigi fasi, ma a fu di den abi a taanga fii fu yeepi taawan” (1 Peitilisi 5:1-3). Sowtu wooko de e du fu wi ede?

De e solugu wi anga de e kibii u tu. Den owluman e gi u lai aini a Beibel, anga de e yeepi a kemeente fu de wan bun mati fu Yehofa. A fu di den sabi taki Gadu gi den wan gaan faantiwowtu, meke den nái basi a foluku fu Gadu. A yeepi de e yeepi den fu abi piisii, anga fu sani mu waka den bun (2 Korentesama 1:24). Leti enke fa wan sikapuman e solugu bun gi ibiiwan fu den sikapu fi en, a leti so den owluman e meke moiti fu kon sabi ibiiwan sama aini a kemeente.​—Odo 27:23.

De e leli u fu du sani enke fa Gadu wani. Ala wiki den owluman e teke fesi fu daai den komakandaa, fu yeepi u fu meke u biibi kon moo taanga (Toli 15:32). Den baala ya e teke fesi tu aini a peleikiwooko, de e wooko makandii anga u fu soi u fa u sa peleiki a omen sowtu fasi.

De e gi ibiiwan fu u taanga sikin. Wi anga Yehofa mu de bun mati, neen ede meke den owluman e kon a wi a osu, efuso de e taki anga wi a komakandaa fu tolowsutu u anga a Beibel.​—Yakowbesi 5:14, 15.

Boiti a wooko di den owluman mu du aini a kemeente, da den mu e wooko tu fu solugu den osufamii. Ala den faantiwowtu ya di den abi, e teke tyaipi ten fu den. U mu e lesipeki den baala ya di e wooko taanga.​—1 Tesalonikasama 5:12, 13.

• Sowtu wooko den owluman e du aini a kemeente?

• Fa den owluman e soi taki de e booko ede anga u?