PISI 23
Sama e sikiifi den buku fu u, anga fa de e du man poti den aini taa tongo?
A Sikiifi Kantoo, Ameekankondee
Zuid-Koreya
Almeniya
Bulundi
Sili Lanka
A fu di u mu paati a „bun nyunsu” gi „sama fu ala nasi, lo, anga tongo”, neen meke wi e sikiifi buku aini wan sani fu 750 sowtu a sowtu tongo (Openbaring 14:6). Fa wi du poi du a taanga wooko ya? A di u abi sama di e sikiifi toli gi u aini somen kondee. Wi abi sama tu di e sikiifi den buku poti aini taa tongo. Ala den a soso Yehofa Kotoigi.
Den sani e sikiifi aini Ingiisitongo fosi. Den baala di e tii a wooko a hii goontapu e tii a wooko di a Sikiifi Kantoo e du na a edekantoo. A kantoo ya e taigi den sama di e sikiifi sani, on sowtu sani den mu sikiifi. Den sama di e sikiifi sani e wooko na a edekantoo anga den taa kantoo fu Yehofa Kotoigi. A di wi abi sama na ala se fu goontapu di e sikiifi sani gi u, meke u man sikiifi ala sowtu toli fu somen kondee poti aini den buku fu u di e naki a ati fu ala sowtu sama.
De e sende den sani di sikiifi go gi den sama di e poti den buku go aini taa tongo. Te den kaba sikiifi den toli dan de e luku efu a bun. Bakadati de e sende den sani di sikiifi anga computer go gi den guupu sama a hii goontapu di e poti den buku go aini taa tongo. Den sama de e luku efu den sani di den sikiifi poti aini taa tongo, e kai anga san sikiifi aini a Ingiisitongo. De e luku tu efu taawan o poi leisi efuso fusutan den sani di den sikiifi. De e meke taanga moiti fu sikiifi den „soifili sani di de tuu” poti go aini a tongo fu den. Den wani meke den seefi toli di sikiifi aini Ingiisi mu sikiifi tu aini a tongo fu den.—Peleikiman 12:10.
Computer e meke a wooko go gaw. Wan computer á poi du a wooko di den sama di e sikiifi buku man du, efuso den wan di e poti den buku go aini taa tongo. Ma tokuso a wooko fu de e go gawgaw te de e wooko anga computer. Yehofa Kotoigi meke wan sani di de e kai MEPS (Multilanguage Electronic Publishing System). Anga a sani de den baala e poti den buku go aini omen ondoo ondoo tongo. Anga a sani de de e sete ala den wowtu anga fowtow poti a pampila tapu.
San meke wi e du ala den moiti de fu sikiifi buku poti aini taa tongo, awinsi a wan tu sama namo e taki den tongo de? A fu di Yehofa wani „ala sowtu sama mu kon fii anga de mu kon sabi a waaleiti soifili”.—1 Timotiyesi 2:3, 4.
-
Sowtu sani den baala e du fu sikiifi den buku fu u?
-
Saide wi e poti den buku fu u go aini somen sowtu tongo?
