Ala yali, a olikanisâsi fu u e meke somen ondoo miliyun Beibel anga taa buku e paati gi sama, sondee fu den sama pai. Wi e meke komakandaa peesi anga Betel osu. Wi e solugu somen tenti dunsu sama di e wooko a Betel anga den zendeling. Te wan gaan nowtu pasa a wan peesi, da wi e go yeepi den baala fu u anga den sani di den abi fanowdu. A sani ya sa meke i akisi iseefi taki: ’Pe wi e fende a moni fu du ala den sani ya?’

U nái waka piki moni, anga wi nái dwengi sama fu gi u moni. Anga ala fa fuu moni de fanowdu fu du a peleikiwooko, tokuso wi nái begi sama moni. A pasa wan ondoo yali kaa di a di fu tu Waktitoren be soi taki wi e biibi taki Yehofa na a sama di e taanpu gi u, neen meke „noiti wi o begi efuso go akisi sama fu den yeepi u”. Wi á begi moni noiti wan dei tu.​—Mateyesi 10:8.

A di sama e gi moni fu di denseefi wani, neen meke wi poi du a wooko ya. Fuu sama e teke a wooko di wi e du fu bigi, neen meke de e gi u moni. Den Kotoigi seefi lobi koboloiki den ten, den kaakiti, den moni anga taa sani fu du a wani fu Gadu a hii goontapu (1 Koloniki 29:9). Den Kownukondee zaal anga den peesi pe wi e holi gaan komakandaa e abi pikin kedee pe sama sa poti moni. Sama sa go na a website fu u jw.org fu gi moni fu holibaka gi a wooko tu. Gaan se fu a moni fu du a wooko ya, a pooti sama e gi en, enke fa a pooti uman di Yesus be gafa, be poti tu pikin moni aini a moni kedee fu a tempel (Lukasi 21:1-4). A so meke ala yuu ibiiwan sama sa „poti wan pikin moni a wan se” da a „gi san en ati fii”.​—1 Korentesama 16:2; 2 Korentesama 9:7.

Wi abi a fitoow taki Yehofa o tan go na a ati fu den sama di wani gi en ’gaandi anga den gudu di den abi’ fu meke den holi baka gi a Kownukondee wooko. Den o tan holi baka gi a wooko ya, te enke a kon a wan kaba.​—Odo 3:9.

• Saide meke a olikanisâsi fu Yehofa Kotoigi anga den taa keliki kengi?

• San e pasa anga den moni di sama e gi anga den hii ati aini a kemeente?