A omen tenti yali kaa Yehofa Kotoigi e koboloiki, de e meke anga e paati omen sowtu Beibel. U be si taki a be de fanowdu fu meke wan nyun Beibel di be o yeepi sama fu kon „sabi a waaleiti soifili”. A dati a sa Gadu wani tu (1 Timotiyesi 2:3, 4). Neen meke aini a yali 1950, u bigin tyai son pisi fu u Beibel kon a doo, a Nyun-Grontapuvertaling aini Ingiisitongo. A Beibel ya sikiifi na a fasi fa sama e taki aini a ten ya. A wan soifili fasi den sikiifi en poti go aini moo enke 130 tongo.

Wan Beibel be de fanowdu di makiliki fu fusutan. Wan tongo di sama e taki e kengi saafi saafi, anga fuu Beibel abi wowtu aini di á makiliki fu fusutan. Sama fende moo sani tu fu hawten, di e soi moo soifili san den sikiifiman fu Beibel seefi be sikiifi. A sani ya be meke taki sama be man fusutan den pisi aini Beibel di sikiifi aini Hebeleitongo, Alameisitongo, anga a Giikitongo.

Wan soifili fasi fu sikiifi Beibel abaa be de fanowdu aini u tongo. Den sama di sikiifi Beibel abaa aini taa tongo, á be mu kengi den sani di Gadu meke den sikiifiman sikiifi aini En Buku, ma den be mu sikiifi den soifili. Tokuso fuu Beibel ná abi a nen fu Gadu, Yehofa, aini.

Wan Beibel be de fanowdu di e gi gaandi na a Sikiifiman fi en. (2 Samuweli 23:2). Enke fa a fowtow a ondoose ya e soi, da aini a Nyun-Grontapuvertaling den poti a nen fu Yehofa a sowan 7000 peesi baka ape a be de kaba aini den moo hawten Beibel (Psalm 83:18). Fu di a omen yali langa den be ondoosuku sani finifini, meke a Beibel ya switi fu leisi, anga ai soi kiin fa Gadu e pakisei fu sani. Efi i abi a Nyun-Grontapuvertaling, efi i ná abi en, tokuso wi e gi i a taanga fu abi a gwenti fu leisi a Wowtu fu Gadu ala dei.​—Yowsuwa 1:8; Psalm 1:2, 3.

• San meke u be si taki a de fanowdu fu meke wan nyun Beibel?

• San wan sama mu e du ala dei efu a wani sabi fa Gadu e pakisei fu sani?