A Hebelei wowtu Betel, wani taki „osu fu Gadu” (Genesesi 28:17, 19). A nen ya fiti den kantoo fu Yehofa Kotoigi di de a hii goontapu. Na ape de e tii a peleikiwooko di e du aini wan kondee. Den baala di e tii a wooko fu Yehofa Kotoigi e wooko na a edekantoo aini New York, wan foto aini Ameekankondee. A edekantoo e tii a wooko di de e du a den somen beikantoo fu Yehofa Kotoigi a hii goontapu. A den sama di e wooko a Betel de e kai a Betelfamii. Leti enke wan tuutuu famii, a so de e libi, e wooko anga nyan makandii. De e sutudeli a Beibel anga makandii tu.​—Psalm 133:1.

Betel a wan peesi pe sama de kabakaba fu gi denseefi. Ibiiwan fu den Betel osu abi Kelesten man anga uman di gi den libi abaa a Gadu fu du a wani fi en. Den sama de e wooko ala dei gi a Kownukondee (Mateyesi 6:33). Ná wan fu de e fende pai efuso moni gi a wooko di de e du. Ma ala den fiya e fende nyanyan anga wan tanpeesi. De e fende wan pikin moni tu fu bai sani di den abi fanowdu. Ala sama a Betel e kisi wan wooko di den mu du. Son sama e wooko aini kantoo, taawan aini kukuu, efuso a kambaa pe de e nyan. Taawan baka e wooko ape de e meke buku, taawan e kiin kambaa, son wan fu de e wasi koosi. Taawan e seeka den sani di booko na a peesi. Taa wooko de tu di sama sa du na ape.

Betel a wan peesi pe sama e wooko taanga fu holi baka gi a peleikiwooko. A moo gaan sani fu saide meke de e wooko a Betel, a fu yeepi tyaipi sama kon sabi den tuu leli fu Beibel. A buku ya a wan fasi fa de e du a sani de. A den baala di e tii a wooko fu Yehofa kotoigi meke a buku ya sikiifi. Den sende en anga computer go gi ondoo ondoo sama di e wooko a den beikantoo fu meke den poti en aini den tongo di de e taki. Den doloki a buku ya anga gaan masini di e doloki buku gawgaw, neen baka dati den sende en go gi ala den 110.000 kemeente a hii goontapu. Ala den sani ya di a Betelfamii e du, na fu holi baka gi a moo gaan wooko di mu du a goontapu, dati na a bun nyunsu di mu paati.​—Malikisi 13:10.

• Sama e wooko a den Betel osu? Sowtu sani sete gi den na ape?

• Sowtu gaan wooko den sama di e wooko a Betel e holi baka gi?