Somen sama e denki taki Yehofa Kotoigi na a nen fu wan nyun keliki. Ma moo enke 2700 yali kaba, Beibel be e kai den diniman fu a wan enkii tuu Gadu, en „kotoigi” (Yesaya 43:10-12). Te doo a yali 1931, sama be sabi wi enke Beibel Ondoosukuman. San meke wi kengi teke a nen Yehofa Kotoigi?

A nen ya e meke sama kon sabi a Gadu fu u. Enke fa den sani di sama be sikiifi aini hawten e soi, da a nen fu Gadu, Yehofa, sikiifi moo enke seibi dunsu toon aini Beibel. Di sama sikiifi a Beibel poti aini taa tongo, neen den puu a nen fi en poti den wowtu Masaa efuso Gadu. Ma a tuu Gadu be meke Mosesi kon sabi a nen fi en. A be taigi en: „A disi a mi nen fu tego” (Ekisodesi 3:15). Anga dati a be wani meke sama sabi taki en anga den falisi gadu a ná a wan. Wi e piisii fu tyai a santa nen fu Gadu.

A nen ya e soi sowtu wooko wi e du. Aini a ten di pasa da a omen sama be e taki anga taawan fu a biibi di den be e biibi aini Yehofa. Abeli di be e libi a wan leti-opu fasi be de a fosi sama di be du a sani de. Bakaten i be abi taa sama enke Nowa, Abalaham, Sala, Mosesi, Dafeti anga taawan ete, di be de enke „wan gaan woluku kotoigi” (Hebrewsama 11:4–12:1). Leti enke fa de e kai wan kotoigi fu kon a fesi kuutu fu taki gi wan sama di á du nawan ogii, a letiso useefi e opo taki gi a Gadu fu u.

Wi e waka a Yesesi baka. A Beibel e kai en „a kotoigi di i sa fitoow, a wan di nái lei” (Openbaring 3:14). Yesesi seefi be taki a meke sama kon sabi a nen fu Gadu. Ala yuu a be e leli sama den tuu toli fu Gadu (Yohanisi 17:26; 18:37). Neen ede meke den tuu bakaman fu Yesesi mu tyai a nen fu Yehofa. Den mu meke sama sabi a nen de tu. Na a sani de Yehofa Kotoigi e meke muiti fu du.

• San meke den Beibel Ondoosukuman teke a nen Yehofa Kotoigi?

• O langa Yehofa abi kotoigi a goontapu kaa?

• Sama na a moo gaan Kotoigi fu Yehofa?