Omen Yehofa Kotoigi i sabi? Sowan fu u e tan aini a biiti fi i, e wooko na a seefi peesi anga i, efuso wi na sikoomati fi i. Sonten u be taki fu Beibel anga i wan leisi kaa. Ma sama a wi tuutuu? San meke wi e taki anga taa sama fu den sani di wi e biibi?

Wi de enke ala taa sama. Wi na sama fu ala sowtu nasi. Sowan fu wi pooti, ma taawan gudu. Sowan fu wi be e go a wan taa keliki fosi. Taawan fu wi á be e biibi aini Gadu. U be teke ten fu sutudeli Beibel bunbun fosi u toon Yehofa Kotoigi (Toli 17:11). U si kiin taki den sani di wi leli a tuu sani, neen ede meke useefi teke a bosoloiti fu dini Yehofa.

U sa fende wini te wi e sutudeli Beibel. Leti enke ala taa sama, a so useefi abi polobelema anga den sondu fii tu. Ma te wi e meke muiti fu wooko ala dei anga den leli fu Gadu Wowtu, da sani e waka moo bun aini u libi (Psalm 128:1, 2). Dati a wan fu den sani san meke wi e paati den bun sani di wi leli fu Beibel anga taa sama.

Wi e wooko anga den weiti fu Gadu. Den weiti fu Gadu di sikiifi aini Beibel, e yeepi u fu lesipeki taawan, fu libi wan leti-opu libi anga fu abi switifasi gi taawan. Den weiti fu Beibel e yeepi sama fu de gusontu anga fu wooko taanga aini a libimakandii. De e yeepi osufamii fu libi na a wan, anga fu tyai denseefi a wan fasi di fiti. A di wi e biibi taki „Gadu á lobi a wan sama moo a taawan”, neen meke wi e libi enke famii anga den baala anga sisa fu u aini a biibi, a hii goontapu. Wi nái si enke a nasi fu u bun moo den taawan. Wi nái mumui aini politiki. Aladi wi de enke ala taa sama tokuso wi na wan apaiti foluku.​—Toli 4:13; 10:34, 35.

• Na on sowtu fasi Yehofa Kotoigi de enke ala taa sama?

• Sowtu bun manii den Kotoigi kon abi di den sutudeli Beibel?