Efu wan Kotoigi e kon leli i kaa, da yu e seeka a fesi fosi i sutudeli. Efi i wani fende wini fu den komakandaa tuutuu, dan na a seefi sani de i mu du tu. Neen ede meke a moo bun fasi fa u sa fende wini fu den komakandaa, a te u gwenti sutudeli den sani di wi o luku a komakandaa a fesi.

I mu sabi o ten anga pe i mu sutudeli. O ten moo bun gi i fi i sutudeli? A fuuku mamanten fosi i bigin du i wooko, efuso te neti baka te den pikin go siibi. Winsi i ná o poi sutudeli langa, tokuso i mu poti ten a wanse fu sutudeli. Yu á mu meke taa sani kon aini a yuu de tu. Suku wan koo peesi pe i sa sutudeli. Yu á mu meke tv, ladio efuso telefon puu i pakisei na a sani di yu o sutudeli. Efi i begi fosi i bigin sutudeli, da a sani de o yeepi i fi i nái pakisei den booko ede fi i tumisi. A o yeepi i fu poti ala i pakisei na a sani di yu o sutudeli.​—Filipisama 4:6, 7.

Suku den piki, seeka iseefi fu gi piki tu. Fosi i bigin, da suku fu kon fusutan a hii toli di yu o leisi. Te i kon sabi a nen fu a toli di yu o leisi, da i mu teke denki fi en. Luku fa den edepakisei aini a buku abi fu du anga a toli di yu o leisi. Bakadati luku den fowtow anga luku den akisi a ondoose fu a buku tu, fu kon sabi sa a den sani di i mu poti pakisei a den. Baka dati leisi ala den palaklafu, da luku den akisi fu den pisi de tu, fi i mu sabi san i mu piki. Leisi den Beibeltekisi di de aini a pisi de tu. I mu meke moiti fu kon sabi san den Beibeltekisi abi fu du anga a toli di yu e leisi (Toli 17:11). Efi i si a piki fu den akisi aini den pisi di yu e leisi, da i mu kaabu anga sikiifi tiki a den wowtu de ondoo, di o yeepi i fu man membee a piki baka. Te i de a komakandaa, i sa opo i finga a tapu fu gi wan satu piki.

Te yu e sutudeli ibiiwan fu den toli di wi e taki fu den ala wiki a den komakandaa, den yu o kon sabi somen nyun sani. A „magisin” fu den toli fu Beibel di yu abi o kon moo bigi.​—Mateyesi 13:51, 52.

• Na on sowtu fasi u mu e seeka useefi gi den komakandaa?

• Fa i sa seeka iseefi fu gi piki a komakandaa?