A omen yali kaba di den Yehofa Kotoigi e gi leli fu Beibel. Sikoo de gi den sama di e koboloiki ala den ten fu leli sama sani fu a Kownukondee fu Gadu. A so den e du ala san den poi aini a wooko fu Gadu.​—2 Timotiyesi 4:5.

Pionili Sikoo. Te wan sama pionili doo wan yali, da a sa go a wan sikoo di e holi sigisi dei langa. A sikoo ya e holi aini wan fu den komakandaa peesi fu Yehofa Kotoigi. A sikoo ya e yeepi den pionili fu toon wan moo bun mati fu Gadu. Ai yeepi den tu fu du a wooko fu den moo bun anga fu holi doo aini a wooko di den e du.

Sikoo gi Kownukondee Peleikiman. A sikoo ya e holi tu mun langa. Pionili di abi ondoofeni aini a peleiki wooko e kisi leli fu man yeepi a peesi pe yeepi de fanowdu. Son leisi den abi fu foloisi go tan a wan taa peesi. A leti enke den e piki taki: „Luku mi ya, sende mi”. Anga dati den e soi taki den e waka a Yesesi Kelestesi baka, a moo gaan peleikiman di be de a goontapu. (Yesaya 6:8; Yohanisi 7:29) Te den foloisi gwe so, da son leisi den abi fu kengi a hii fasi fa den be e libi, go teke nyun gwenti a pe den go. Son peesi moo koo, taawan moo waan, den e nyan taa sowtu nyanyan tu. Son leisi a wan taa tongo den abi fu leli. A sikoo ya e yeepi baala anga sisa di á toow anga taawan di toow fu man soi den fasi fu Yehofa di den o abi fanowdu a pe den e go. Den mu abi 23 te go miti 65 yali. Ala den sama ya e kisi leli di e meke den toon wan moo bun wookoman fu Yehofa aini a olikanisâsi fi en.

Wakititolen Beibel Sikoo Gilead. Aini Hebrewtongo, a wowtu Gilead wani taki „Somen kotoigi”. Fanafu di Gilead opo aini 1943, den sende moo enke 8.000 zendeling di kisi leli na a sikoo ya go a taa kondee fu go peleiki te a den moo faawe peesi a goontapu. A omen wini den tyai kon kaba a den peesi pe den go. (Toli 13:47) Di den fosi zendeling doo aini Peru náwan kemeente be de aini a kondee. Nownow a moo enke 1.000 kemeente de aini a kondee. Di den zendeling bigin peleiki aini Yapan, a á be doo tin Kotoigi aini a kondee. Nownow a moo enke 200.000 Kotoigi de ani a kondee. Feifi mun langa den e ondoosuku a Wowtu fu Gadu finifini na a sikoo ya. Den e kai sama di e wooko enke Spesuutu Pionili, den zendeling di e peleiki, den sama di e wooko a den beikantoo anga den kelen-owluman fu kon teke leli na a sikoo ya. A sikoo ya e yeepi den fu meke a wooko di e du a hii goontapu waka a wan moo bun fasi.

• Fu saide a Pionili Sikoo e holi?

• Sama sa go na a Sikoo gi Kownukondee Peleikiman?