Te wan gaan ogii pasa a wan peesi da Yehofa Kotoigi e seeka sani wantewante fu yeepi den baala anga sisa na a pisi de. Den sani di de e du e soi taki den abi tuutuu lobi gi den baala anga sisa fu den (Yohanisi 13:34, 35; 1 Yohanisi 3:17, 18). A sowtu fasi wi e yeepi den?

Wi e gi moni. Di wan gaan angii ten be kon aini Yudeya, neen den Kelesten aini Antiyokiya sende moni go gi den baala anga sisa fu den aini Yudeya (Toli 11:27-30). A so wi e du tu te polobelema miti den baala fu u a taa kondee. Wi e gi a moni de aini u kemeente fu den sa bai sani di den abi taanga fanowdu.​—2 Korentesama 8:13-15.

Wi e yeepi makandii. Den owluman di de na a peesi pe a sani pasa e suku ala den sama fu a kemeente fu sabi efu sani á miti den. Wan guupu fu baala di e seeka sani fu yeepi sama di de a nowtu, e sete sani fu den baala anga sisa fende nyanyan, wataa, koosi, wan tan peesi anga dataa fu luku den. Fuu Kotoigi di sabi du son wooko, e pai den moni fu go a den peesi pe a nowtu pasa, fu yeepi meke efuso fu seeka den osu anga den komakandaa peesi di booko. A wanfasi di wi abi anga a wooko di wi e wooko a makandii fuu yali kaa, e meke u man yeepi den baala anga sisa fu u gawgaw di de aini nowtu. Anga ala fa wi e langa ana yeepi „taa biibiman enke useefi”, tokuso wi e yeepi sama tu di á de aini a biibi fu u.​—Galasiyasama 6:10.

Wi e tolowsutu den anga a Beibel. Den sama di de aini gaan polobelema abi tolowsutu fanowdu. A den yuu de Yehofa „a Gadu di e tolowsutu sama”, e taanga u (2 Korentesama 1:3, 4). Wi e piisii fu soi den sama di de a nowtu san Beibel e paamisi u. Wi e leli den taki a ná o teke langa moo da a Kownukondee fu Gadu o puu den banowtu di e meke sama e pina.​—Openbaring 21:4.

• Saide meke den Kotoigi e opo du sani gawgaw te wan gaan ogii pasa a wan peesi?

• Fa u sa tolowsutu den sama di de aini nowtu?