San meke den sama ya e piisii so? A fu di den de a wan fu den gaan komakandaa fu u. Aini hawten den futuboi fu Yehofa be mu e kon dii boo a makandii aini wan yali. A letiso wi aini a ten ya mu du tu. U lobi te wi e kon a makandii aini gaan kulu (Deitolonomi 16:16). Ala yali wi abi dii gaan komakandaa: Tu kelen komakandaa di e holi wan dei, anga a dii dei komakandaa di wi e kai konkelesi. On sowtu wini wi e fende fu den komakandaa ya?

Wi e toon moo bun mati fu den baala anga sisa fu u. Leti enke fa den Dyusama be e piisii fu gafa Yehofa „te den be kon a makandii”, a letiso wi e piisii fu dini Yehofa tu a den gaan komakandaa (Psalm 26:12; 111:1). Den sowtu gaan komakandaa ya, e gi wi a okasi fu miti den baala anga sisa fu taa kemeente anga fu taa kondee. Te mindii dei da wi e nyan na ape makandii. A sani de e meke wi e moo piisii na a peesi pe wi e kisi leli fu Yehofa (Toli 2:42). Na ape wi e si wanten wanten a lobi di e tei „ala baala anga sisa” fu goontapu kon na a wan.​—1 Peitilisi 2:17.

De e yeepi u fu abi wan moo taanga biibi. Den Dyusama be e fende wini „te sama be e leli den finifini” den toli di de aini a Buku fu Gadu (Nehemiya 8:8, 12). Useefi tu e teke den sani di wi e leli a den gaan komakandaa fu bigi. Ala den toli di wi e leli de, komoto aini a Beibel. Den moi taki di de e holi anga den sani di de e soi, e leli u fa u mu du a wani fu Gadu moo bun aini u libi. Wi e kisi taanga te wi e yee fa taawan e holi doo aini den polobelema di de e miti fu di de e dini Yehofa. De e pee Beibel dalama a den konkelesi. Den dalama de e soi u fa u sa wooko anga sani di wi e leli. A den gaan komakandaa de den sama di gi denseefi abaa a Gadu, sa teke dopu tu.

• San meke ai gi wi piisii fu de a den gaan komakandaa?

• Fa u sa fende wini fu den gaan komakandaa?