A bun nyunsu ya komoto na a koloku Gadu. A wani meke ala osufamii de koloku (1 Timotiyesi 1:11). Neen na a sama di sete a toowlibi. Te wan man anga wan uman toow a lanti enke fa a fiti, da a sani de e meke den tu man anga den pikin fu den de koloku. Ai meke lobi de aini a osu tu. Kelesten sama mu go sikiifi den nen aini lantibuku te den o toow. A so den o soi taki den e lesipeki den weiti fu a kondee.​—Leisi Lukasi 2:1, 4, 5.

Fa Gadu e si a toowlibi? Gadu wani a man anga a uman tan a makandii ala ten. Yehofa wani taki man anga uman mu tei holi a makandii (Hebelei 13:4). Yehofa á lobi te sama e booko toow (Maleyaki 2:16). Ma ai gi Kelesten sama a okasi fu booko toow, efuso fu toow baka te a paa fu den waka gi den.​—Leisi Mateyesi 19:3-6, 9.

Yehofa be meke man anga uman fu holibaka gi denseefi aini a toowlibi fu sani waka bun (Genesesi 2:18). A man na a edeman fu a osu. Neen ede meke neen abi a faantiwowtu fu solugu gi den sani di a osufamii abi fanowdu. A mu e leli den sani fu Gadu tu. A mu abi tuutuu lobi gi a uman fi en. A man anga en uman mu lobi denseefi, den mu e lesipeki makandii tu. Ala man anga uman e meke fowtu, neen ede meke den mu leli fu gi makandii paadon. A sani de o yeepi den fu a toowlibi fu den de koloku.​—Leisi Efese 4:31, 32; 5:22-25, 33; 1 Peitilisi 3:7.

Efu sani nái waka bun aini i toowlibi, da ibiiwan fu u mu meke muiti fu soi lobi gi a taawan (1 Kolenti 13:4, 5). A Wowtu fu Gadu nái leli man anga uman taki te den paati, da a sani de o losi den polobelema di den abi aini a toowlibi.​—Leisi 1 Kolenti 7:10-13.

Yehofa wani fi i de koloku. Ai gi i den moo bun lai di sa yeepi i fu man piisii aini i yonkuu yali. A wani meke i fende wini fu a koni anga a ondoofeni fi i mma anga i dda (Kolosense 3:20). Yehofa, a sama di meke i, wani i piisii te yu e du sani enke fa en anga En Manpikin wani.​—Leisi Peleikiman 11:9–12:1; Mateyesi 19:13-15; 21:15, 16.

I mu wooko taanga fu solugu gi den sani enke koosi, nyanyan anga wan osu fu tan aini (1 Timotiyesi 5:8). Ma efi i wani den pikin fi i de koloku, da i mu leli den fu den lobi Yehofa anga fu den teke leli fi En tu (Efese 6:4). Efu i abi tuutuu lobi gi Gadu, da a sani de o yeepi den pikin fi i fu lobi Gadu tu. Te yu e koboloiki a Wowtu fu Gadu fu gi den leli, da a sani de o yeepi den pikin fu toon bun sama.​—Leisi Deitolonomi 6:4-7; Odoo 22:6.

Ai tyai wini kon gi den pikin fi i te yu e gafa den anga te yu e gi den taanga sikin. Son leisi den pikin abi pii-ai anga seeka fanowdu. Den sowtu leli ya e kibii den pikin fu den á tyai denseefi a wan fa na fiti fasi (Odoo 22:15). Tokuso noiti u mu sitaafu den a wan ogii ati fasi.​—Leisi Kolosense 3:21.

Yehofa Kotoigi meke somen sowtu buku fu yeepi mama, dada anga pikin. Den sani di de aini den buku ya, teke puu aini Beibel.​—Leisi Pisalon 19:7, 11.