A bun nyunsu di e taki fa sama o libi fu tego a goontapu, sikiifi aini a Beibel (Pisalon 37:29). A Beibel paati aini 66 pikin buku. A wan sani fu 40 leti-opu man Gadu teke fu sikiifi a Beibel. A wan sani fu 3500 yali pasa kaa di Mosesi be sikiifi den fosi feifi buku fu Beibel. A 1900 yali pasa kaa di a aposteli Yohanisi sikiifi a lasiti buku fu Beibel. On sama pakisei den sikiifiman sikiifi poti aini a Beibel? Na a santa yeye fu Gadu be e taigi den man ya sa den be mu sikiifi (2 Samuweli 23:2). Den sikiifi den pakisei fu Gadu, ná di fu denseefi. A so meke a Yehofa na a Sikiifiman fu a Beibel.​—Leisi 2 Timotiyesi 3:16; 2 Peitilisi 1:20, 21.

Luku a felon di den e kai Sama sikiifi a Beibel?

U sabi taki a Beibel a fu Gadu, bika a abi toli aini di e taki finifini fa sani o waka aini a ten di e kon. Wi libisama á poi sabi sani a fesi so (Yowsuwa 23:14). Na a moo Hei Gadu wawan man si finifini a fesi fa a libi fu u o waka.​—Leisi Yesaya 42:9; 46:10.

Wi e fusutan taki efu wan buku komoto a Gadu, da a buku de o de wan apaiti buku. A so a Beibel de tu. Moo enke 2000 miliyun Beibel paati aini 450 tongo. Beibel sikiifi a hawten, tokuso ai kuudei anga den sani di koniman kon sabi. Den 40 man di Gadu teke fu sikiifi a Beibel sikiifi sani di e kuudei anga makandii. * A Beibel e soi u taki Gadu lobi u tuutuu. Te anga a dei fu tide seefi, da a Beibel poi kengi  sama libi kon moo bun. Den sani ya e meke miliyunmiliyun sama fusutan taki Beibel na a Wowtu fu Gadu tuu.​—Leisi 1 Tesalonika 2:13.

Luku a felon di den e kai Fa u du sabi taki a Gadu a Beibel komoto?

Wan fu den bun nyunsu di sikiifi aini Beibel e taki fu a moi sani di Gadu abi a pakisei fu du gi libisama. Beibel e soi fa libisama be lasi a gaandi fu libi aini wan paladeisi a goontapu ya. Ma ai taki tu fa a paladeisi o seeka baka na a goontapu yaaso.​—Leisi Kon A Kiin 21:4, 5.

A Wowtu fu Gadu abi weiti, leli, anga lai. Ma Beibel e soi tu fa Gadu e libi anga sama. Den sani ya e soi u fa Gadu de. Neen ede meke Beibel sa yeepi i fi i kon sabi Gadu. Ai yeepi i fu fusutan fa i sa toon wan mati fi en tu.​—Leisi Pisalon 19:7, 11; Yakowbesi 2:23; 4:8.

A buku ya o yeepi i fu fusutan Beibel. A o tyai den toli fu Beibel kon a kiin gi u enke fa Yesesi be e tyai den kon a kiin gi sama. A be e kai den tekisi, da a be e yeepi den sama fu fusutan „den sani di sikiifi aini a Wowtu fu Gadu”.​—Leisi Lukasi 24:27, 45.

Wan fu den sani di sama moo lobi na a bun nyunsu fu Gadu. Tokuso yu abi son sama di nái wani aliki a bun nyunsu, taawan dati á lobi en seefiseefi. Ma yu á mu lasi ati. Efi i wani fende a tego libi, da a de taanga fanowdu fu kon leli sabi Gadu.​—Leisi Yohanisi 17:3.