PISI 8
San meke Gadu fika ogii anga pina fu e pasa?
1. Fa ogii libi bigin a goontapu?
Gadu fika libisama fu tii wan hii pisi ten fu soi taki den á poi losi den polobelema fu libisama
Na a fosi lei di Saatan meke tyai ogii kon a goontapu. Di Yehofa be meke Saatan, da a be de wan bunbun engel. Ma Saatan „á be tan aini waaleiti” (Yohanisi 8:44). A be kweki wan taanga fii fu sama be mu dini en, wan sani di a Gadu wawan too mu kisi. Neen ede meke Saatan koli Efa fu a aliki en, ape fu a aliki Gadu. Adan be holi baka gi Efa tu fu taangayesi Gadu. Na a sani di Adan du de, tyai pina anga dede kon a goontapu.—Leisi Genesesi 3:1-6, 19.
Di Saatan koli Efa fu taangayesi Gadu, da a so a bigin gi sama a taanga fu den á saka denseefi na a tii fu Gadu ondoo moo. A moo gaanse pisi fu libisama teke a se fu Saatan, bika denseefi á wani Gadu enke den Tiiman. A so meke Saatan toon „a tiiman fu goontapu.”—Leisi Yohanisi 14:30; 1 Yohanisi 5:19.
2. Den sani di Yehofa be meke be abi fowtu?
Nawan fu den sani di Gadu meke be abi fowtu. Gadu be meke libisama anga den engel a so wan fasi taki den be sa aliki en ala yuu, sondee fu misi wan dei (Deitolonomi 32:4, 5). A fasi fa Gadu meke u, da wi abi a okasi fu useefi luku efu wi o du bun efuso ogii. Neen ede meke wiseefi poi soi efu u lobi Gadu.—Leisi Yakowbesi 1:13-15; 1 Yohanisi 5:3.
3. San meke Gadu fika ogii meke den e pasa te anga now ete?
Senten a ten fu Adan anga Efa, neen Yehofa fika libisama fu den du san den wani. Fu saide? A fu soi libisama taki den á poi tii denseefi bunbun (Peleikiman 7:29; 8:9). Aini den 6000 yali di libisama de a goontapu da a kon a kiin taki libisama tiiman á man puu feti, ogii libi, kukutu libi anga siki.—Leisi Yelemiya 10:23; Lomeini 9:17.
Te Gadu e tii, da den sama di e saka denseefi neen ondoo e fende wini fu dati (Yesaya 48:17, 18). Dyonson moo da Yehofa o puu ala den tiiman fu a goontapu ya. A soso den sama di e teke a se fu Gadu o tan a goontapu.—Yesaya 11:9.—Leisi Daniyeli 2:44.
Luku a felon di den e kai San meke Gadu fika ogii meke den e pasa te anga now?
4. Sowtu okasi wi abi nownow fu di Gadu e holi pasensi anga u?
Saatan be taki libisama be o dini Gadu soso te sani e go den bun. I be sa wani soi taki a lei Saatan lei anga a sani di a taki de? Eeye, i sa du en tuu! A pasensi di Gadu e holi anga u e gi wi a okasi fu soi efu a Gadu efuso a libisama u wani meke tii u. Na a fasi fa wi e libi o soi sama u wani meke tii u.—Leisi Yop 1:8-12; Odoo 27:11.
5. Fa u sa soi taki a Gadu u wani enke u Tiiman?
Den sani di wi e du e soi efu a Gadu u wani enke u Tiiman
U sa soi taki a Gadu u wani enke u Tiiman, te wi e dini en na a soifili fasi enke fa a sikiifi aini en Wowtu Beibel (Yohanisi 4:23). Efu leti enke Yesesi wi á wani Saatan tii u, da u á mu e mumui anga politiki fu a kondee efuso oloku.—Leisi Yohanisi 17:14.
Saatan e koboloiki a makiti fi en fu meke sama si enke hulu libi anga ogii libi a bunbun sani. Son mati anga famiiman, o go e wisiwasi efuso tesi u te wi á wani du den sowtu sani de (1 Peitilisi 4:3, 4). Neen ede meke a wanse u mu teke. Wi o teke paa anga den sama di lobi Gadu? Wi o aliki den koni weiti fi en di e soi taki a lobi u? Efu wi e du den sani ya, da wi e soi taki Saatan be lei di a taki nawan sama o aliki Gadu te sani o go e taanga gi den.—Leisi 1 Kolenti 6:9, 10; 15:33.
A lobi di Gadu abi gi u libisama e gi wi a taanga biibi taki ogii libi anga pina ná o de moo. Den sama di e soi anga den du fu den taki den e biibi aini Gadu, o piisii fu tego fu a libi a goontapu.—Leisi Yohanisi 3:16.
