Yesesi na a wan kodo sama di be libi a hemel anda enke wan engel, fosi a kon meke a goontapu ya enke libisama (Yohanisi 8:23). Neen na a fosi sani di Gadu be meke. A be yeepi Yehofa meke ala taa sani. Neen na a wan kodo sama di Yehofa wawan too meke. Neen meke anga leti Beibel e kai en a „wan kodo” Manpikin fu Gadu (Yohanisi 1:14). Yesesi be de enke a Takiman fu Gadu, neen ede meke den e kai en „a Wowtu”.​—Leisi Odoo 8:22, 23, 30; Kolosense 1:15, 16.

A Gadu be sende en Manpikin kon a goontapu ya. A be poti a libi fi en manpikin aini a mulu fu wan Dyu uman de e kai Maliya. A uman ya á be didon anga man ete. A so meke Yesesi á be abi wan libisama dada (Lukasi 1:30-35). Yesesi be kon a goontapu fu (1) leli u den tuu toli fu Gadu, (2) fu soi u fa u mu libi enke fa Gadu wani awinsi á makiliki, anga (3) fu gi a libi fi en di ná abi nawan fowtu, enke „wan paiman di be mu pai fu fii wi”.​—Leisi Mateyesi 20:28.

Dede anga gaandi a ná sani di Yehofa be wani be mu miti u. Fa u du sabi a sani ya? Gadu be taigi a fosi man Adan, taki efu a du a sani di Beibel e kai „sondu”, da a be o dede. Neen ede meke efu Adan á be sondu, da á be o dede noiti (Genesesi 2:16, 17; 5:5). Enke fa a Beibel e soi da na Adan „du meke” ala libisama e  dede. A so Adan meke ala den bakapikin fi en kisi sondu. A te u dede da u pai fu den sondu fu u. U be mu kon fii fu a sondu anga a dede ya di u kisi fu Adan.​—Leisi Lomeini 5:12; 6:23.

Sama be o poi pai a paiman fu fii wi puu a dede? A te u dede fosi da u pai a paiman fu den sondu di u be meke. Nawan sondu sama poi pai gi den sondu fu wan taa libisama.​—Leisi Pisalon 49:7-9.

Yesesi á be abi sondu enke fa u abi sondu. Neen ede meke á be abi fu dede fu pai fi en sondu​—noiti a be du sondu tu. Ma Yesesi dede gi den sondu fu taawan. Di Gadu sende a Manpikin fi en kon dede gi u, da a so a soi tuutuu taki a lobi u. Yesesi seefi soi taki a lobi u tu, bika a aliki en Dda, neen a kon dede gi u.​—Leisi Yohanisi 3:16; Lomeini 5:18, 19.

Luku a felon di den e kai Saide Yesesi be mu dede?

Di Yesesi be de a goontapu, da a be e deesi siki sama, a be e meke dede sama kon a libi baka, anga a be e yeepi sama di be e pina. Na a fasi ya a soi san a o du gi den sama di e aliki en (Mateyesi 15:30, 31; Yohanisi 5:28). Di Yesesi dede, neen bakaten Gadu meke a kon a libi baka enke wan yeye (1 Peitilisi 3:18). Yesesi be sidon na a leti se ana fu Gadu te enke Gadu be gi en makiti fu tii a goontapu ya enke Kownu (Hebelei 10:12, 13). Nownow ya Yesesi sidon enke Kownu aini hemel. Na a bun nyunsu ya den bakaman fi en e tyai paati a hii goontapu.​—Leisi Daniyeli 7:13, 14; Mateyesi 24:14.

Dyonson moo, Yesesi o puu pina anga a o puu den sama di e pina taawan tu. Ala den sama di e biibi aini Yesesi fu di den e aliki en, o piisii fu a libi ya a goontapu aini wan Paladeisi.​—Leisi Pisalon 37:9-11.