Gadu wani meke u libisama piisii fu a libi a goontapu. A meke a goontapu anga ala sani fiya neen tapu, fu di a lobi u. Dyonson moo a o seeka sani fu meke sama na ala kondee abi wan bun libi. A o puu ala den sani di e banowtu libisama.​—Leisi Yelemiya 29:11.

Nawan libisama tiiman be poi puu ogii, siki anga dede a goontapu. Ma tokuso wan bun nyunsu de. Dyonso moo da Gadu o puu ala libisama tiiman a pasi, da Enseefi o tii a goontapu. Ala den sama di A o tii o de anga piisii, anga den o abi wan bun gusontu.​—Leisi Yesaya 25:8; 33:24; Daniyeli 2:44.

A te Gadu puu ala den ogii sama a goontapu fosi da pina ná o de moo (Sefanya 2:3). O ten a sani de o pasa? A Wowtu fu Gadu be taki a fesi sa a den sani di be o miti libisama. Den sani di e pasa nownow e soi taki a ná o teke langa moo fosi Gadu tyai faandi kon a goontapu.​—Leisi 2 Timotiyesi 3:1-5.

U mu kon leli sabi Gadu anga yeepi fu a Beibel. A Beibel de enke wan biifi di wan lobi ati dada sende gi den pikin fi en. A Beibel e leli u fa u sa piisii fu a libi aini a ten ya, anga fa u sa piisii fu tego a goontapu aini ten di e kon. A tuu taki á na ala sama o fende en bun taki yu e leli sani fu Beibel. Ma wi á mu meke ná wan sama tapu u, fu u kon sabi den bun sani di Gadu paamisi u aini ten di e kon.​—Leisi Odoo 29:25; Kon A Kiin 14:6, 7.