PISI 6
Sowtu howpu de gi den dedesama?
1. Sa na a bun nyunsu di abi fu du anga den dedewan?
Di Yesesi be de a goontapu ya, da wan mati fi en de e kai Lasalesi be dede. A be e tan aini Betaniya, wan kampu di be de a koosube fu Yelusalem foto. Di Yesesi doo ape, da Lasalesi be dede fo dei kaa. Neen Yesesi go ape den be beli Lasalesi. A be go makandii anga Malita anga Maliya, den sisa fu Lasalesi. Tyaipi sama be kon na ape tu. Na pikin piisii Malita anga Maliya be e piisii di Yesesi be weki Lasalesi puu a dede.—Leisi Yohanisi 11:21-24, 38-44.
Malita be yee a bun nyunsu fu den dedewan kaa. A be sabi taki Yehofa o weki dedesama puu a dede baka fu libi a goontapu.—Leisi Yop 14:14, 15.
2. Sai pasa anga wan sama te a dede?
Gadu be taigi Adan: „Bika a doti mi be teke i puu, da a doti yu o toon baka.”—KENESESI 3:19.
Libisama meke fu doti (Kenesesi 2:7; 3:19). Wi ná abi wan yeye aini u di e libi go doo baka te u dede. Neen ede meke te u dede, da nawan sani fu u sikin e libi go doo. Te u dede, da u fusutan nái wooko moo, ala den pakisei fu u e lasi gwe tu. Neen ede meke di Lasalesi be weki komoto a dede, da á be taki nawan sani fu dede kondee, bika dedesama nái fusutan nawan libi sani moo.—Leisi Pisalon 146:4; Peleikiman 9:5, 6, 10.
A tuu taki Gadu e pina sama aini faya baka te den dede? Efu Beibel e soi taki dedesama á poi fusutan nawan sani moo, da a sani ya e soi taki a leli di e taki fu a pina di Gadu e pina sama aini faya baka te den dede, a wan gaan lei. Soso a pakisei fu pina sama aini faya a wan tegu sani gi Gadu.—Leisi Yelemiya 7:31.
Luku a felon di den e kai Sai pasa anga wan sama te a dede?
3. Dedesama poi taki anga u?
Dedesama á poi taki, den á poi yee tu (Pisalon 115:17). Ogii engel de di e du enke den na den sama di dede, da de e taki anga sama (2 Peitilisi 2:4). Yehofa á wani kweti kweti fu u puubei taki anga dedesama.—Leisi Deitolonomi 18:10, 11.
4. Sama a den sama di o kon a libi baka?
Den miliyunmiliyun sama di dede, o kon a libi baka na a goontapu ya. Son sama seefi di á be sabi Gadu, di be e du ogii, o weki baka tu.—Leisi Lukasi 23:43; Apaiti 24:15.
Den sama di o weki puu a dede o leli tuu sani di abi fu du anga Gadu. Den o kisi a okasi fu soi biibi aini Yesesi tu fu di den o aliki en (Kon A Kiin 20:11-13). Den sama di o kon a libi baka di o du bun sani, o libi fu tego a goontapu yaaso.—Leisi Yohanisi 5:28, 29.
5. San a kon di sama o kon a libi baka e leli u fu Yehofa?
Den dedesama sa kon a libi baka, bika Gadu sende en Manpikin fu kon dede gi u. Neen ede meke a weki di dedesama o weki puu a dede, e meke u fusutan a lobi di Gadu abi gi u anga a gaan bun ati fasi fi en. Sama yu e angii fu si te den dedesama o kon a libi baka?—Leisi Yohanisi 3:16; Lomeini 6:23.
