Efi i wani toon wan mati fu Gadu, da i mu leli sabi En. Den mati fi i sabi i nen? De e kai i ai nen? Eeye. Gadu wani i sabi en nen, a wani i koboloiki en tu. Na a nen fi en de e kai Yehofa (Pisalon 83:18; Mateyesi 6:9). I mu sabi san a lobi anga san á lobi. I mu sabi sama a den mati fi en, anga sama a den feyantiman fi en. A ná aini wan dei yu e kon sabi wan sama bunbun. Beibel e taki, a wan koni sani fu teke ten fu sabi Yehofa.​—Efese 5:15, 16.

Den mati fu Gadu e du den sani di e meke ai piisii. Pakisei den mati fi i. Efi i nái libi bun anga den, yu e du sani di den á lobi, i denki den o tan de i mati? Noiti. Na a seefi a de anga Gadu tu. Efi i wani de en mati da i mu e du sani di e piisii en.​—Yohanisi 4:24.

A ná ala keliki o yeepi i fi i toon mati fu Gadu. Yesesi di be de a moo bun mati fu Gadu, be taki fu tu pasi. Wan fu den pasi baala, sama ipi neen. Na a pasi de e tyai sama go kii. A taa pasi sumaa, sama ná ipi neen. A pasi de, neen e tyai sama go na a libi fu tego. Dati wani taki, efi i wani yu anga Gadu de mati, da i mu sabi soifili fa i mu dini en.​—Mateyesi 7:13, 14.