Den ogii di e pasa nownow a goontapu e soi taki a Paladeisi de koosube. A Beibel be taki a fesi taki u be o si ogii ten fosi a Paladeisi be o kon. Wi e libi nownow aini den ogii ten de. Unku wan tu fu den sani ya di Beibel be taki be o pasa:

Gaan oloku. „A wan nasi o opo feti anga wan taa nasi, anga a wan kownukondee o opo feti anga wan taa kownukondee” (Mateyesi 24:7). Den sani ya pasa so tuu. Fanafu a yali 1914, da tu goontapu feti anga wan tu taa pikin pikin oloku, feti a goontapu. A omen miliyunmiliyun sama dede aini den feti ya.

Takuu siki o de na ala se. „Takuu siki o go e kii somen sama . . . na omen peesi” (Lukasi 21:11). A sani de e pasa tuutuu? Eeye. Kankeli, ati-siki, tuberculose, malaaliya, sida, anga taa sowtu siki kii omen miliyun sama.

Nyanyan angii. A goontapu lai anga sama di ná abi sani fu nyan. Ala yali a omen miliyun sama e dede fu angii ede. A sani ya, a wan taa maiki di e soi u taki a Paladeisi de koosube. A Beibel e taki: „Nyanyan angii be o de.”​—Maakusi 13:8.

 A doti o go e seke piiti goontapu. „A doti o go e seke piiti a goontapu . . . na somen peesi” (Mateyesi 24:7). A sani ya seefi pasa aini a ten ya. Fanafu a yali 1914, da moo enke wan miliyun sama dede, te doti seke e piiti goontapu.

Ogii-ati sama. Sama be o „lobi moni” anga „a soso denseefi na a den o lobi”. Den be o „lobi meke piisii moo enke den lobi Gadu”. Pikin be o „go e taanga yesi den gaansama fu den” (2 Timotiyesi 3:1-5). Iseefi nái si taki a so somen sama e libi aini a ten ya noh? Den ná abi lesipeki gi Gadu. De e fooseli den sama di e meke moiti fu leli sabi Gadu.

Ogii libi. „Kukutu libi seefi be o lai” (Mateyesi 24:12). Sonten iseefi kon si taki ogii libi kon lai moo enke fosi. Sama na ala se fu goontapu e feele taki taawan o fufuu, bidiigi efuso du ogii anga den.

Ala den sani ya e soi taki a Kownukondee fu Gadu de koosube. A Beibel taki: „Te u si den sani di mi taigi u ya e pasa, da u mu sabi taki, a Kownukondee fu Gadu de koosube” (Lukasi 21:31). San na a Kownukondee fu Gadu? Dati na a tii fu Gadu di de a hemel, di o meke a goontapu ya toon wan Paladeisi. Na a Kownukondee fu Gadu o teke a peesi fu den libisama tiiman.​—Daniyeli 2:44.