Te i abi wan mati di yu e lesipeki, da yu e suku fu kon de enke en. Beibel e taki „Yehofa bun, anga ai du sani a wan leti-opu fasi” (Pisalon 25:8). Efu u wani de Gadu mati, dan u mu de bun sama, anga u mu tyai useefi a wan leti-opu fasi tu. Beibel e taki: „Enke lobi pikin fu Gadu, da u mu du sani enke fa u sabi taki Gadu seefi be o du sani, anga u mu tan lobi makandaa” (Efese 5:1, 2). Luku wan tu fasi fa i sa du a sani ya:

I mu e puu taawan a fuka. „U mu du bun gi taawan”.​—Galasiya 6:10.

Wooko taanga. „A sama di e fufuu, mu kaba anga a du de. Meke a go wooko taanga. Meke a du bun wooko anga en ana.”​—Efese 4:28.

I mu kiin, anga i mu e tyai iseefi a wan lesipeki fasi. „Meke u kiin useefi fu ala sowtu sani di sa tyobo a sikin anga fusutan fu u. Meke a lesipeki di wi abi gi Gadu meke u kon toon santa sama.”​—2 Kolenti 7:1.

 Soi lobi anga lesipeki gi den famiiman fi i. „Meke iniiwan fu u . . . lobi en uman enke fa a lobi enseefi. Da soseefi a uman mu abi dipi lesipeki gi en man. Pikin, u mu teke u mma anga u dda taki.”​—Efese 5:33–6:1.

I mu soi taawan taki i lobi den. „Meke u tan lobi useefi, bika a Gadu lobi komoto.”​—1 Yohanisi 4:7.

I mu lesipeki den weiti fu a kondee. „Ala sama mu waka a [lanti] ondoo . . . Gi ala sama san den mu fende. Efi i mu pai wan sama lantimoni, da pai en a lantimoni.” ​—Lomeini 13:1, 7.