Efi i wani toon Gadu mati, da i mu go na a biibi di Gadu e fende bun. Yesesi be taki „den tuu biibiman” be o dini Gadu leti enke fa a „tuutuu leli” e soi (Yohanisi 4:23, 24). A wan kodo bun fasi namo de fu dini Gadu (Efese 4:4-6). A tuu biibi o meke i fende tego libi, ma falisi biibi o meke i lasi i libi.​—Mateyesi 7:13, 14.

Yu o sabi sowtu biibi na a tuu wan te yu e luku a fasi fa den sama fu a biibi de e libi. Yehofa bun, neen meke den diniman fi en mu de bun sama tu. Leti enke fa wan bun apeesina bon e meke bun apeesina, a letiso a tuu biibi abi bun sama tu.​—Mateyesi 7:15-20.

Den mati fu Yehofa abi dipi lesipeki gi a Beibel. Den sabi taki a Gadu a Beibel komoto. De e libi anga den sani di Beibel e taki. De e wooko anga den sani di Beibel e taki fu losi den polobelema fu den. Na a Beibel yeepi den fu kon sabi Gadu moo bun tu (2 Timotiyesi 3:16). De e meke moiti fu libi tu enke fa den e leli taa sama.

 Den mati fu Yehofa e soi lobi gi makandii. Yesesi be soi taki a lobi sama fu di a be e leli den sani fu Gadu, anga a be e deesi den tu. Den sama di de aini a tuu biibi e soi taki den lobi taawan tu. Leti enke Yesesi, den nái wisiwasi pootiman efuso sama fu taa nasi. Yesesi be taki sama be o sabi den disipelli fi en, te den be o si a lobi di den abi gi makandii.​—Yohanisi 13:35.

Den mati fu Gadu e gi gaandi na a nen fi en di de e kai Yehofa. Efu wan sama nái wani kai i ai nen, yu anga a sama de o de bun mati? Ehee! Te wi abi wan mati, da wi e kai en neen nen. Wi e gafa en gi taawan tu. A so meke den sama di wani toon mati fu Gadu, mu kai en neen nen tu. Den mu gafa en tu gi taawan. Na a sani ya Yehofa wani u du.​—Mateyesi 6:9; Lomeini 10:13, 14.

Leti enke Yesesi a so den mati fu Gadu e leli sama fu a Kownukondee fu Gadu. A Kownukondee fu Gadu a wan tii a hemel di o meke a goontapu ya toon wan paladeisi. Den mati fu Gadu e taki fu a bun nyunsu fu a Kownukondee ya anga taa sama.​—Mateyesi 24:14.

Den Yehofa Kotoigi e meke moiti fu de Gadu mati. De e lesipeki a Beibel. Den abi lobi gi makandii. De e lesipeki a nen fu Gadu, anga de e koboloiki en tu. De e taki anga taa sama fu a Kownukondee fu Gadu. Aini a ten ya, a den Yehofa Kotoigi abi a tuu biibi.