I sa leli sabi Yehofa, te yu e leisi a Beibel. Langa ten pasa kaa, neen Gadu be teke sama fu sikiifi den pakisei fi En. A den sani di den sama de sikiifi de e kai Beibel. Aini a ten ya wi e leli sani fu Gadu, te wi e leisi a Beibel. A fu di a wowtu fu Yehofa efuso a bosikopu fi en sikiifi aini Beibel, meke de e kai en a Wowtu fu Gadu. U sa biibi san Beibel e taki bika Yehofa nái lei noiti. „Gadu á poi lei” (Hebelei 6:18). A Wowtu fu Gadu e leli u tuu sani fi en.​—Yohanisi 17:17.

A Beibel a wan fu den moo dii kado di Gadu gi u. A de enke wan biifi di wan lobi-ati dada sende gi en pikin. A Beibel e taigi u taki Gadu o kengi a goontapu toon wan moi peesi fu tan​—wan paladeisi. Ai soi u san Gadu du aini den ten di pasa, san ai du now, anga san a o du ete gi den pikin fi en di lobi En. A Beibel e yeepi u tu fu losi den polobelema fu u, anga fu de koloku.​—2 Timotiyesi 3:16, 17.

 Den Yehofa Kotoigi a mati fu Gadu, den sa yeepi i fu fusutan a Beibel. A fi i taigi den namo taki i wani sutudeli Beibel. Den ná o akisi i moni (Mateyesi 10:8). I sa kon a den Kelesten komakandaa tu, di e holi a den komakandaa peesi fu u. Efu yu e go a den komakandaa, da esi-esi yu o kon leli sabi tyaipi sani fu Gadu.

I sa leli sabi sani fu Gadu te yu e luku den sani di a meke. Beibel taki: „Gadu be meke hemel anga goontapu” (Kenesesi 1:1). Di Yehofa be meke „hemel”, neen a meke a san tu. San a sani ya e leli u fu Gadu? Ai leli u taki Yehofa abi makiti dyow. Neen namo too sa meke den sowtu makiti sani ya enke a san. Beibel e soi u tu taki Yehofa koni, bika koni be de fanowdu fu meke a san di e pii, fu gi u waan anga leti. Noiti a san o tapu fu pii.

Den sani di Yehofa meke e soi taki a lobi u. Pakisei den somen sowtu a sowtu sii di de a goontapu ya. Yehofa be sa meke wan kodo sowtu sii namo gi u​—efu a be wani seefi á be abi fu meke náwan gi u tu. Ma Yehofa meke ala sowtu sii gi u, gaanwan anga pikinwan. Den abi ala sowtu kololu anga tesi. A sani ya e leli u taki Yehofa Gadu á lobi u namo, ma a lobi gi u tyaipi sani tu. Ai pakisei u, anga a abi switifasi tu.​—Pisalon 104:24.