Yehofa ná o fika ogii sama fu den poli a Paladeisi. A soso den mati fi en o tan de. San o pasa anga ogii sama? Efi i wani sabi, da i mu luku a toli fu Nowa. A omen dunsu yali pasa kaa, di Nowa be libi. A be de wan bun sama di ala yuu be e meke moiti fu du sani enke fa Gadu wani. Ma den taa sama a goontapu be e du soso ogii. A so meke Yehofa be taigi Nowa taki a o kii den ogii sama anga wan gaan wataa. A be taigi Nowa fu meke wan gaan boto di de e kai wan alek, fu kibii en anga en osufamii, fu den á be mu dede te a gaan wataa be o kon.​—Kenesesi 6:9-18.

Nowa anga en osufamii be meke wan alek. Nowa be wasikoi den sama taki wan gaan wataa be o kon, ma den á be aliki en. Den be e tan du ogii. Di a alek be kaba meke neen Nowa tyai meti go aini. En anga en osufamii be go aini tu. Neen Yehofa meke wan gaan alen kai. A alen kai 40 dei anga  40 neti langa. A so meke a hii goontapu be sungu.​—Kenesesi 7:7-12.

Den ogii sama be dede, ma Nowa anga en osufamii be tan a libi. Yehofa be kibii den pasa a gaan wataa, fu den be sa libi aini wan goontapu pe ogii libi á de moo (Kenesesi 7:22, 23). Beibel taki, wanten o kon baka pe Yehofa o kii ala den sama di á wani du bun sani. A ná o kii den bun sama. Ma den o libi fu tego aini a Paladeisi a goontapu ya.​—2 Peitilisi 2:5, 6, 9.

Somen sama e du ogii aini a ten ya. Goontapu ipi anga booko ede. Ala yuu baka Yehofa e sende den Kotoigi fi en fu wasikoi sama. Ma tokuso gaanse fu den á wani aliki san Yehofa e taki. Den á wani kengi a fasi fa de e libi. Den á wani teke san Gadu e taki fu bun anga ogii. San o pasa anga den sama ya? Den o kengi wan dei? Somen ná o kengi. A yuu o doo di Gadu o kii ala ogii sama. Noiti moo den o libi.​—Pisalon 92:7.

A goontapu ya ná o kaba soso, ma a o toon wan Paladeisi. Den sama di toon Gadu mati o libi fu tego a Paladeisi a goontapu.​—Pisalon 37:29.