Saatan e koli sama fu du ogii. Wan sama di wani toon Gadu mati mu buuse den sani di Ai buuse (Pisalon 97:10). Luku wantu sani di den mati fu Gadu e koti pasi gi:

Sondu na a se fu man anga uman libi. „Yu á mu de wan ganda man” (Ekisodesi 20:14). A fowtu fu siibi anga wan sama di yu á toow anga en.​—1 Kolenti 6:18.

Duungu. „Duunguman . . . ná o go aini a kownukondee fu Gadu.”​—1 Kolenti 6:10.

Kii sama, anga puu bee. „Yu á mu kii sama.”​—Ekisodesi 20:13.

Fufuu. „Yu á mu fufuu.”​—Ekisodesi 20:15.

Lei. Yehofa e buuse „a lei di sama e lei.”​—Odoo 6:17.

 Ogii libi, anga hebi ati boon. „[Yehofa] e buuse ala den sama di lobi ogii sani” (Pisalon 11:5). „Takuu losutu di fuu libisama ati [a sani enke] . . . hebi atiboon.”​—Galasiya 5:19, 20.

Sitee fu wini moni, efuso bai lowte. „Yu á mu mosoo moo anga giiliman.”​—1 Kolenti 5:11.

A buuse di sama e buuse taa nasi. „I mu lobi i feyantiman, anga i mu begi tu gi den sama di e tesi i.”​—Mateyesi 5:43, 44.

Den sani di Gadu e taigi u, a fu sani mu waka u bun. A ná ala yuu a makiliki fu holi iseefi fu yu á du ogii. Ma Yehofa anga den Kotoigi fi en sa yeepi i fu wai pasi gi ogii.​—Yesaya 48:17; Filipense 4:13; Hebelei 10:24, 25.