A lobi e meke tu sama toon mati. O moo yu e leli fu Yehofa, o moo yu o kon lobi en. Te a lobi di i abi gi Gadu o kon moo bigi, da yu o angii fu dini en moo tu. A sani ya o meke i wani toon wan disipelli fu Yesesi Kelestesi (Mateyesi 28:19). Te i kon aini a famii fu Yehofa Kotoigi, da a so yu o tan wan mati fu Gadu fu tego. San i mu du?

Gi yesi a den weiti fu Gadu. „Te u lobi Gadu, da wi o go e du san den weiti fi en e taki. Tokuso den weiti fi en á de enke wan hebi gi u.”​—1 Yohanisi 5:3.

Wooko anga den sani di i leli. Yesesi be gi wan toli di e soi fu saide u mu du a sani ya. Wan koniman be meke en osu fasi kinkin a siton tapu. Ma wan donman be meke en osu a santi tapu. Di wan gaan alen kon, da a osu di be meke a siton tapu be taanpu gingin. Ma a osu di be meke a santi tapu booko kai holow. Yesesi taki, den sama di be o yee den leli fi en, da den wooko anga den, be o de enke a koniman di meke en osu a siton tapu. Ma den sama di be o yee den leli fi en, da den á wooko anga den, be o de enke a donman di be meke en osu a santi tapu. Sowtu wan fu den tu man ya i wani de?​—Mateyesi 7:24-27.

 Piki Gadu taki i wani dini en. A sani ya wani taki, yu o begi Gadu, da yu o taigi en taki i wani dini en fu tego. Te yu e du sani enke fa Gadu wani, da a so yu e soi taki yu a wan disipelli fu Yesesi Kelestesi.​—Mateyesi 11:29.

Dopu. „Teke dopu. Kai a nen fu Yesesi, da a so yu o kisi paadon fu den sondu fi i.”​—Apaiti 22:16.

Du ala san i poi aini a wooko fu Gadu. „Awinsi san yu e du, du en anga i hii ati anga ala i kaakiti enke a gi Yehofa yu e du en, ná gi libisama.”​—Kolosense 3:23.