A moo gaan feyanti fu Gadu a Saatan Didibii. En a wan yeye di taangayesi Gadu. Te enke now, Saatan e feti anga Yehofa ete, anga ai tyai polobelema kon gi libisama. Saatan abi ogii ati. En a wan leiman anga wan kiiman.​—Yohanisi 8:44.

Wan tu taa engel go mokisa denseefi anga Saatan fu taangayesi Gadu. Beibel e kai den, ogii yeye. Leti enke Saatan, a so den ogii yeye a feyanti fu libisama tu. Den lobi du ogii anga sama (Mateyesi 9:32, 33; 12:22). Yehofa o kii Saatan anga den ogii yeye fi en. A wan satu ten namo den abi ete fu du ogii anga sama.​—Openbaring 12:12.

Efi i wani de Gadu mati, da i á mu e du den sani di Saatan wani fi i du. Saatan anga den ogii yeye e buuse Yehofa. Den a feyantiman fu Gadu. Den wani i toon wan feyanti fu Gadu tu. Ma iseefi mu luku sama i wani meke piisii, Yehofa efuso Saatan. Efi i wani a tego libi, da i mu e du sani enke fa Gadu wani. Saatan abi omen fasi fa ai koli sama. A so meke ai fende omen sama e kisi.​—Openbaring 12:9.