Yesesi Kelestesi na a Manpikin anga a moo bun mati fu Yehofa. Yesesi be e libi a hemel enke wan makiti engel (Yohanisi 17:5). Bakaten neen a kon a goontapu ya enke libisama, fu leli sama den tuu toli fu Gadu (Yohanisi 18:37). A dede gi den sama di e aliki Gadu fu fii den fu sondu anga dede (Lomeini 6:23). Nownow Yesesi na a Kownu fu Gadu Kownukondee, wan tii di de a hemel anda di o meke a goontapu ya toon wan Paladeisi.​—Openbaring 19:16.

Den engel a mati fu Gadu tu. A ná goontapu a libi fu den engel bigin enke libisama. Gadu be meke den a hemel anda kaa, fosi a be meke a goontapu (Yopu 38:4-7). A omen miliyunmiliyun engel de (Daniyeli 7:10). Den mati fu Gadu ya di de a hemel anda, wani meke wi enke libisama sabi den tuu toli fu Gadu.​—Kon A Kiin 14:6, 7.

Gadu abi mati a goontapu ya tu, ai kai den En kotoigi. Wan kotoigi a wan sama di si wan sani di pasa, da ai taigi taa sama bakaten san a si. Yehofa Kotoigi e taigi taa sama san den sabi fu Yehofa, anga san A o du (Yesaya 43:10). Leti enke den engel, a letiso den Kotoigi wani yeepi i fi i kon sabi den tuu toli fu Yehofa. Den wani i toon Gadu mati tu.