A paladeisi ná o de enke a goontapu di wi e libi aini nownow. Gadu á be wani noiti taki pen anga pina be mu de a goontapu. Aini a ten di e kon, Gadu o meke a goontapu ya toon wan Paladeisi. Fa a libi o de aini a Paladeisi? Kon meke u luku san a Beibel e taki:

Bun sama. A Paladeisi o de a tanpeesi fu den mati fu Gadu. Den o go e du bun gi makandii. Den o libi a wan leti fasi enke fa Gadu wani.​—Odoo 2:21.

Tyaipi nyanyan o de. Náwan sama o de anga angii aini a Paladeisi. A Beibel e taki: „Tyaipi nyanyan o de na a goontapu.”​—Pisalon 72:16.

Moi osu anga wooko di e gi piisii. Aini a Paladeisi, ala osufamii o abi den osu. Ala sama o du wooko di e gi piisii.​—Yesaya 65:21-23.

Náwan feti o de a goontapu. Sama ná o feti moo efuso dede aini oloku. A Wowtu fu Gadu e taki: „Gadu o tyai wan kaba kon a feti.”​—Pisalon 46:8, 9.

 Bun gosontu. Beibel e paamisi u taki: „Náwan sama (den wan di o libi aini Paladeisi) o taki: ’Mi siki’” (Yesaya 33:24). Malengiisama, beendisama, dofusama, anga babawman ná o de moo.​—Yesaya 35:5, 6.

Pen, tyali anga dede ná o de moo. A Wowtu fu Gadu e taki: „A o dee den wataa ai fu den. Da dede, tyali, kee anga pen ná o de moo. Bika den fositen sani pasa gwe kaa.”​—Kon A Kiin 21:4.

Ogii sama ná o de moo. Yehofa e paamisi u taki: „Den ogii sama. . . o koti puu a goontapu. Soseefi bidiigiman ná o de moo tu.”​—Odoo 2:22.

Libisama o libi a makandii anga den o lesipeki denseefi. Ala sama o du sani a wan leti-opu fasi. Sama ná o pina taawan moo, giiliman anga ogii-ati sama ná o de moo tu. Ala sama o libi a makandii enke fa Gadu wani.​—Yesaya 26:9.