I mu meke moiti fu fende wan mati, anga i mu meke moiti fu tan oli wan mati tu. A tyaipi belesi yu o fende fu a moiti di yu e meke fu de wan mati fu Gadu, anga fu tan wan mati fi en tu. Yesesi be taigi den sama di be e biibi aini en taki: „A tuutuu leli o meke u kon fii” (Yohanisi 8:32). San a sani ya wani taki?

I sa kon fii nownow. Yu o kon fii fu den falisi leli anga den lei di Saatan paati na ala peesi. Den somen miliyunmiliyun sama di á sabi Yehofa, ná abi wan howpu. I ná o de enke den sama de (Lomeini 8:22). Den mati fu Gadu kon fii tu fu a „feele di sama e feele den dedewan.”​—Hebelei 2:14, 15.

Yu o piisii fu a fii di wi o abi aini a nyun goontapu. Aini a ten di e kon, yu o fii tuutuu! Aini a Paladeisi da feti ná o de moo, siki, anga ogii ná o de moo tu. Angii anga pina ná o de moo. Gaandi anga dede ná o de moo tu. Sama ná o go e feele efuso pina taawan. A Beibel e taki: „Yu o opo i ana, da a so ala libisani fiya o fende san den abi fanowdu.”​—Pisalon 145:16.

 Den mati fu Gadu o libi fu tego. Tego libi a wan kado di Gadu e gi ala sama fiya di e meke moiti fu toon en mati (Lomeini 6:23). Pakisei pikinso san a libi di yu o libi fu tego o wani taki gi i!

Yu o abi ten fu du somen sani. Sonten yu o wani leli fa i sa pee gitali, koti tembee, efuso meke bakisi. Kande yu o wani sabi moo sani fu den somen meti di de, anga den sowtu a sowtu uwii a goontapu ya. Sonten i wani go koi luku somen peesi, kande go a taakondee seefi. A te yu o libi fu tego yu o poi du ala den sani ya!

Yu o abi ten fu meke somen mati. Te yu o libi fu tego, da a sani ya o meke i kon sabi somen sama di de Gadu mati. Yu o kon sabi sani di den poi du, anga den bun manii fu den. Yu o lobi den. A so denseefi o lobi i tu (1 Kolenti 13:8). A libi di yu o libi fu tego o meke i toon mati fu ala sama fiya a goontapu! A moo bun wan a taki, den somen ondoo ondoo yali di yu o libi, o meke yu anga Yehofa toon moo bun mati. I mu tan wan mati fu Gadu fu tego.