Saatan anga den ogii yeye fi en, á wani i dini Gadu. De e puubei fu puu ala sama na a se fu Gadu. Fa de e puubei fu du a sani de? Falisi keliki a wan fu den sani di de e koboloiki (2 Kolenti 11:13-15). Den keliki di nái leli sani enke fa a sikiifi aini Beibel, a falisi wan. Falisi keliki de enke wan kasaba nyanyan di sikin moi a doose ma a loto a inise. Te i luku en da a gei enke a bun, ma inise fi en poli, a ná abi yeepi.

Falisi keliki á man piisii Yehofa noiti, bika en na a Gadu fu a tuu. Di Yesesi be de a goontapu, da wan a duupu kelikiman be de di be wani kii en. Den be denki taki a fasi fa den be e dini Gadu be de a bun wan. Den be taki: „Wi abi wan kodo Tata, dati a Gadu.” Yesesi be piki anga den? Kweti! A taigi den taki: „A Didibii a u tata” (Yohanisi 8:41, 44). Tide na a dei, somen sama e denki taki de e dini Gadu. Ma fu taki en enke fa a de, da a Saatan anga den ogii yeye de e dini!​—1 Kolenti 10:20.

 Enke fa wan bon di á bun á poi meke bun nyanyan, a letiso falisi keliki e meke sama e du sani di á bun. A di sama e du somen ogii, meke goontapu lai anga polobelema. Sama e feti, de e fufuu, e kii, e libi hulu libi, e fooseli taawan, anga de e dwengi taawan fu didon anga den. Fuu sama di e du den ogii ya, e go a keliki, ma a keliki fu den nái yeepi den fu libi bun. Den anga Gadu ná o poi de mati, boiti efu den tapu anga den ogii libi ya.​—Mateyesi 7:17, 18.

Falisi keliki e leli sama fu begi pobiki. Gadu á wani u begi pobiki. A abi leti. I be o lobi te wan sama noiti e taki anga i, ma da ai taki anga wan fowtow fi i? I sa taki a sama de a yu tuutuu mati? Nono, a sama de á man de i mati. Yehofa wani u taki anga en. A á wani u begi pobiki efuso fowtow di ná abi libi.​—Ekisodesi 20:4, 5.

Falisi keliki e leli sama taki a ná abi ogii fu kii sama a oloku. Yesesi be taki den mati fu Gadu be o lobi makandii. Wi nái kii sama di u lobi (Yohanisi 13:35). Ma wi á mu kii ogii sama tu. Di den feyantiman fu Yesesi be kon fu kisi en tyai gwe, da á be meke den disipelli fi en feti gi en fu yeepi en.​—Mateyesi 26:51, 52.

Falisi keliki e leli sama taki ogii sama o go boon aini faya. Ma Beibel e leli u taki a sondu e meke sama e dede (Lomeini 6:23). Yehofa a wan Gadu fu lobi. I si enke wan lobi-ati Gadu o pina sama fu tego? Kwetikweti. Aini a Paladeisi da a wan kodo biibi namo o de, dati na a wan di Yehofa fende bun (Kon A Kiin 15:4). Náwan fu den keliki di e paati den lei fu Saatan, o de moo.