PISI 4
Fa fu koboloiki moni
„Te wi e meke taawan poti wi a pasi, da den sani di u wani du o waka bun.”—Odo 20:18
Ala sama abi moni fanowdu fu man solugu den osufamii (Odo 30:8). Winsi fa, „moni e kibii sama” (Peleikiman 7:12). A ná ala yuu a makiliki gi wan man anga en uman fu taki moni toli. Ma wi á mu meke moni fanya u toowlibi (Efeisesama 4: 32). Man anga uman mu e fitoow denseefi. Den mu man fusutan denseefi te den e taki fa den o koboloiki moni.
1 TAKI FITI FA WI O KOBOLOIKI MONI
SAN BEIBEL E TAKI FU A TOLI YA: „Ondi fu u ya o wani meke wan osu, da a á go sidon luku fosi, efu a moni di a abi o sai fu kaba meke en?” (Lukasi 14:28) A bun fu u sidon taki fa wi o koboloiki u moni (Amos 3:3). Luku san u abi fanowdu, anga omen moni u poi puu aini u saka ala mun (Odo 31:16). Ná fu di wi abi a moni fu bai wan sani, da u mu bai en namo namo, winsi a á de fanowdu. Koboloiki a moni di i abi. Ná go suku fu meke paiman.—Odo 21:5; 22:7.
SAN I MU DU:
-
Efu moni fika ete te a mun tapu, da u mu taki fiti san wi o du anga en
-
Efu u si taki moni nái sai, da u mu sidon luku san u mu du fu wi á koboloiki moni ipi so moo. Efi i be lobi bai nyanyan a sitaati, da a moo bun fi i boli a osu
2 TAKI KIIN FA SANI DE, NÁ KOLI A TAAWAN
SAN BEIBEL E TAKI FU A TOLI YA: „Bika te wi e du sani, da wi e du en anga wan kiin ati a Yehofa anga libisama fesi” (2 Korentesama 8:21). Meke a sama di yu anga en toow sabi omen moni yu e kisi anga omen yu e koboloiki.
U mu taki fiti fosi i go bai gaan sani (Odo 13:10). Te wi e taki fa wi o koboloiki moni da a sani de o yeepi u fu u nái meke toobi fu moni ede. Yu á mu si enke a moni di yu e wooko a fi i wawan, ma na fu a hii osufamii.—1 Timotiyesi 5:8.
SAN I MU DU:
-
U mu taki fiti te anga omen moni ibiiwan fu u sa koboloiki sondee fu akisi a taawan
-
Ná tan te moni polobelema de fosi da u bigin taki fu moni