Te wan man anga wan uman meke wan pikin ai de wan piisii sani gi den, ai gei den nái sabi san den mu du tu. Te den meke pikin fosi leisi so, da kande den seefi nái fusutan fa a du kon taki den abi somen ten fanowdu fu luku a pikin fu den. Yu a o go e siibi sai. A fasi fa yu e fii o go e kengi tu. Neen ede meke yu o abi fu meke moo moiti fu a libi fu u waka bun. Wi o abi fu du son sani taa fasi fu man solugu a pikin fu u. Fa den leli fu Beibel sa yeepi u fu du den sani ya?

SAN BEIBEL E TAKI FU A TOLI YA: „Lobi abi pasensi anga bun manii.” Lobi nái „suku wini fi en wawan. A nái mandii gaw” tu (1 Korentesama 13: 4, 5). Iniiwan mma di meke en fosi pikin e poti ala en pakisei neen. A sani ya o meke a man fi i bigin fii enke i ná abi ten gi en. Neen meke yu á mu feegete fu poti pakisei neen tu. Ma efi i tan abi pasensi anga en, da a so yu o meke a si taki yu abi ten gi en. A o si taki i wani a yeepi i solugu a pikin tu.

„Yu enke manengee di toow mu soi taki yu abi koni fu libi anga a uman fi i” (1 Peitilisi 3:7). I mu puubei fu fusutan taki a uman fi i o abi fu koboloiki moo ten gi a pikin fi yu anga en. A fositoon de, di a meke pikin, neen meke a kan taki en ede o go e sipan son leisi, a o go e weli efuso e fi i booko saka son leisi. A kan taki son leisi en ati o go e boon ai tu, ma yu á mu ligei anga en, bika „a sama di ati nái boon gawgaw bun moo wan taanga man” (Odo 16:32). Soi en taki yu e fusutan en, i mu yeepi en tu.​—Odo 14:29.

SAN I MU DU:

• Dda: Yeepi a uman fi i luku a pikin. Ná mamanten wawan, ma te neti tu. Fika son sani di i be lobi du fosi, fi i sa de makandaa anga yu uman anga i pikin

• Mma: Efu i man akisi i fu yeepi yu anga a pikin, yu á mu taki nono. Efu a nái du en bun yu á mu kuutu en, ma soi en anga ala pasensi fa a mu du en

SAN BEIBEL E TAKI FU A TOLI YA: „Den o toon wan sikin” (Genesesi 2:24). Ala di ná u tu man wawan de moo, yu á mu feegete taki yu anga a sama di i toow anga en e tan „wan sikin.” Du ala san u man fu meke a toowlibi fu u go bun.

I mu si en enke wan gaan sani te a man fi i wani yeepi i. Te yu e taigi en taki a fasi fa ai yeepi i e bigi gi i, da a sani de o meke a fii bun (Odo 12:18). I mu taigi yu uman fa i lobi en kisi. Gafa en fu a fasi fa ai solugu a osufamii.​—Odo 31:10, 28.

„Náwan sama mu suku wini fi en wawan, ma meke a du sani di taawan o fende wini fi en” (1 Korentesama 10:24). Meke moiti ala yuu fu du sani di o tyai wini gi a toowpaa fi i. Te u toow u mu e teke ten fu taki anga makandaa, e gafa a taawan te a du wan sani. I mu e aliki te a taawan e taki. Te a de fu siibi enke man anga uman wi á mu e denki useefi namo. Luku san i man efi i uman wani. Beibel taki „Yu á mu mombii a taawan, boiti efu na taki u taki fiti” (1 Korentesama 7:3-5). A bun fu u tu man taki a toli ya finifini. Di a taawan o si taki yu abi pasensi anga en, di a o si taki yu e booko i ede anga en, da dati o meke a toowlibi fu u waka moo bun.

SAN I MU DU:

• Yu á mu feegete fu e meke ten gi a taawan

• Du pikinpikin sani fu soi a sama di yu anga en toow taki i lobi en. Kande i sa puu taigi en tu taki i lobi en, efuso gi en wan pikin kado

SAN BEIBEL E TAKI FU A TOLI YA: „Fanafu i de wan beibi neen yu e leli sani aini den santa buku fu Gadu. A den leli ya o meke i kon koni fu man tan a libi” (2 Timotiyesi 3:15). U mu seeka a fesi fa wi o kweki a pikin fu u. Fanafu wan pikin de aini en mma bee, a poi fusutan sani kaba. Te wan pikin de aini en mma bee ai sabi en mma anga en dda siten te a yee den. Ala san a mma e fii, enseefi e fii tu. Te a pikin de aini bee i mu e leisi gi en. Aladi a nái fusutan san yu e leisi, tokuso a leisi di yu e leisi de o yeepi en fu lobi leisi di a o kon moo bigi.

Noiti i mu si enke a pikin fi i yonkuu tumisi fu taki anga en fu Gadu. Meke ai yee fa yu e begi Yehofa (Deitolonomi 11:19). Winsi a pee yu e pee anga en, taki fu den sani di Yehovah meke (Psalm 78:3, 4). Te a pikin fi i e kon bigi, a o si taki i lobi Yehofa, da enseefi o lobi Yehofa so tu.

SAN I MU DU:

• Begi Yehofa akisi en fa fu kweki i pikin

• Kai den sani di i wani a pikin fi i holi a ede omen leisi gi en, da fuukufuuku a o bigin leli sani