’U mu de leliman’ (Heb. 5:12). Pakisei a sani ya: Yehofa a moo bun Leliman e taigi u taki u mu leli taawan sama neen. Ai bigi gi u taki wi abi a gaandi fu leli wi osufamii, a kemeente anga den sama di wi e miti aini a peleikiwooko fu kon sabi Yehofa. Ma a sani ya a ná wan lawlaw sani. San o yeepi u fu du a wooko ya bun?

A sani di Pawlesi be taigi Timotiyesi o yeepi u. A be taigi en taki: „Meke moiti naamo fu e leisi gi sama, fu gi den taanga-sikin, fu leli den te enke mi kon.” Boiti dati a taki: „Te i du so, da yu anga den sama di e aliki yu o man fende a libi” (1 Tim. 4:13, 16). Den sani di u mu leli sama sa yeepi den fu fende a tuutuu libi. Neen meke u mu meke moiti fu toon bun leisiman anga leliman. A bolosilo ya o yeepi i fu du a sani ya. Luku fa a sete:

Yehofa na a „Moo Bun Leliman” (Yes. 30:20). Winsi fa a bolosilo ya meke fu yeepi i fu leisi anga fu gi leli moo bun, yu á mu feegete taki a Yehofa abi a bosikopu di wi e paati. Neen e hali sama kon dini en (Yoh. 6:44). Neen meke i mu e begi Yehofa ala yuu fu a gi yu en santa yeye. I mu e wooko anga a Wowtu fu Gadu ala yuu. Yu á mu du sani pasa peesi fu sama poti pakisei a yu, ma yeepi den fu si taki a Yehofa e leli den. Yeepi den fu kon lobi Yehofa.

Yehofa gi yu a gaandi fu paati a moo pelensipali bosikopu di de. Wi e biibi taki efi yu e fitoow „a kaakiti di Gadu e gi”, yu o toon wan bun leliman.​—1 Peit. 4:11.

U baala di e wooko makandaa anga u,

Den baala di e tii a wooko fu Yehofa Kotoigi a hii goontapu