Yu e si den man na a fowtow?— Den nen na Mateyesi, Malikisi, Lukasi, Yohanisi, Peitilisi, Yakowbesi, Yudasi anga Pawlesi. Ala den be e libi na a ten fu Yesesi. Den sikiifi toli fu Yesesi. Kon u go leli moo sani fu den.

Dii fu den sikiifiman ya a be apostel di be peleiki makandaa anga Yesesi. A wantu fu den fosi bakaman fu Yesesi den be e kai apostel. I sabi sama a den dii apostel ya di be sikiifi toli fu Yesesi?— Den apostel ya a  be Mateyesi, Yohanisi, anga Peitilisi. Mateyesi anga Yohanisi be sabi Yesesi bun. Ibiiwan fu den be sikiifi wan buku di e taki fu a libi fu Yesesi. A apostel Yohanisi be sikiifi wan buku den e kai Openbaring anga dii biifi. A fosi biifi a be 1 Yohanisi, du fu tu a be 2 Yohanisi, du fu dii a be 3 Yohanisi. A apostel Peitilisi sikiifi tu biifi di de aini Beibel. Den e kai den 1 Peitilisi anga 2 Peitilisi. Aini 2 Peitilisi a sikiifi fa Yehofa be taki komoto a hemel fu Yesesi taki: ’Disi ya a mi manpikin, mi lobi en, mi e piisii anga en.’

Den taa man na a fowtow e leli u sani fu Yesesi tu aini den buku di den sikiifi. Wan fu den a Malikisi. Kande a be si san pasa di den go kisi Yesesi. Wan fu den taawan a Lukasi. Lukasi a be wan dataa. A gei enke a baka di Yesesi dede fosi, neen a toon wan bakaman fi en.

Tu fu den taa man di yu e si na a fowtow, a Yesesi pikin baala. Denseefi be de aini sikiifi Beibel. I sabi fa den e kai den?— Yakowbesi anga Yudasi. Bigin bigin den á be e biibi Yesesi. Den be e si en enke wan lawman. Ma bakaten den biibi en, neen den toon bakaman fi en.

A lasti sama di yu e si na a fowtow a Pawlesi. Enseefi sikiifi Beibel tu. Fosi a toon wan bakaman fu Yesesi, den be e kai en Sawlesi. A be e buuse den bakaman fu Yesesi. A be e du ogii anga den tu. I sabi san meke Pawlesi toon wan bakaman fu Yesesi?— Wan dei a be de a pasi e go a wan peesi, neen wan sama taki anga en komoto a hemel. A Yesesi be e taki anga en! A akisi Pawlesi taki: ‘Saide meke yu e du ogii anga den bakaman fu mi so?’ Bakaten Pawlesi toon wan bakaman fu Yesesi. A sikiifi 14 fu den buku di de aini a Beibel, fanafu Romesama te go miti Hebrewsama.

Na ala dei wi e leisi Beibel. Ná so noh?— Te wi e leisi a Beibel, da wi e leli somen sani fu Yesesi. I be sa wani leli moo sani fu Yesesi?—