I sabi sowtu Kownukondee wi e taki?— A Gadu Kownukondee. Na a Kownukondee ya o meke goontapu toon wan paladeisi. I wani sabi moo fu a Kownukondee ya?—

Ala kownukondee abi wan kownu. Na a kownu e tii den sama aini a kondee. I sabi sama na a Kownu fu a Kownukondee fu Gadu?— A Yesesi Kelestesi. Ai tan a Hemel. Dyonson Yesesi o tii ala sama a goontapu! Yu á si enke a libi o switi te Yesesi o tii goontapu noh?—

A libi o switi. Sama ná o go e feti anga taawan moo. Den ná o kii taawan aini oloku moo di wi o de aini a Paladeisi. Ala sama o lobi taawan. Sama ná o siki efuso dede moo. Beendi sama o si baka. Dofu sama o yee baka. Den sama di á poi waka nownow o man lon. Den o man dyombo a tapu. Ala sama o go e nyan te a sai den. Meti ná o go e du ogii anga den seefi moo. Den ná o du ogii anga libisama moo tu. Den sama di dede o weki baka. Somen fu den sama di u leli sani fu den aini a buku ya, o kon a libi baka. Den sama enke Lebeka, Rakab, David anga  Eliya. I be sa wani si den di den o weki baka?—

Yehofa lobi yu. A wani i de koloku. Efi i tan leli sani fu Yehofa, e aliki en, da yu o libi fu tego aini wan moi paladeisi! Yu á wani libi fu tego noh?—