Meke u go luku wan toli fu wan boi di be yeepi en omu fu a á dede. A omu fu a boi ya a be a apostel di den e kai Pawlesi. Wi á sabi a boi ya nen, ma u sabi taki a du wan sani di be soi taki a abi tuutuu deki-ati. I wani sabi san a be du?—

Pawlesi be de a sitaafu osu a Yelusalem. Den be kisi en tyai go sooto fu di a be e taki fu Yesesi. Ma wantu ogii man be e buuse Pawlesi, neen den meke mofu fu du ogii anga en. Den taki: ’Meke wi akisi a suudati edeman fu a meke den suudati fi en tyai Pawlesi go na a kuutu osu fu den Dyu. Wi o kibii a pasi, da wi o kii en te ai pasa.’

Ma wan sisa pikin fu Pawlesi yee san den be wani du anga Pawlesi. San i denki a du? A go na a sitaafu osu pe den be sooto Pawlesi, neen a taigi en san den wani du. Pawlesi taigi en taki meke a go taigi a suudati edeman san den man taki, a á mu daaidaai. I si enke a be makiliki gi a boi ya fu taki anga a edeman fu den suudati?— A á be makiliki, bika a be wan heihei man. Ma a sisa pikin fu Pawlesi á be e feele fu taki anga en.

A edeman be sabi san a mu du. A sende 500 suudati go anga Pawlesi fu yeepi en! A taigi den fu tyai Pawlesi go a Seisaleya a seefi neti de. Den ogii man fende Pawlesi kii?— Eehee, den á be poi du náwan sani anga en! A so Pawlesi be tan a libi.

San a toli fu Pawlesi ya e leli i?— Iseefi sa abi deki-ati enke a sisa pikin fu Pawlesi. Wi á mu e feele te wi e leli taawan sani fu Yehofa. Yu o go e soi taki i nái feele fu taki anga taa sama fu Yehofa?— Efi i nái feele, da yu o man yeepi taa sama fu den á dede.