Timotiyesi a wan boi di be lobi yeepi sama. A be e go a omen peesi fu go yeepi sama. A sani ya be meke a be e piisii aini a libi. I wani sabi a toli fi en?—

Timotiyesi kweki aini wan foto den e kai Listra. Di a be nyoni, neen en gaanmma Lowis anga en mma Eunise be bigin leli en sani fu Yehofa. Di Timotiyesi kon moo bigi, a be wani yeepi taa sama fu kon sabi sama a Yehofa.

Timotiyesi a be wan boi ete di Pawlesi akisi en fu go peleiki anga en a taa peesi. A piki en taki: ’Mi wani go!’ Timotiyesi be de kabakaba fu go anga en go yeepi taa sama.

Timotiyesi be go anga Pawlesi te a  wan foto den e kai Tesalonika. A foto ya de aini a kondee di den e kai Masedoniya. Fu doo Tesalonika, den be mu waka langa anga futu. Da baka dati den be mu teke boto, fosi den be o doo. Di den doo, den yeepi somen sama fu kon sabi Yehofa. Ma son sama ati be e boon a den, neen den be wani du ogii anga den. Neen meke Pawlesi anga Timotiyesi komoto de go peleiki a taa peesi.

Baka wantu mun, Pawlesi akisi Timotiyesi fu go a Tesalonika baka fu go luku fa ai go anga den baala anda. A be mu abi bunbun deki-ati fu go anda baka, bika sama be wani du ogii anga den na a foto de kaba. Ma Timotiyesi be go, bika a be e booko en ede anga den baala anda. A tyai bun nyunsu gi Pawlesi di a daai kon baka. A piki en taki ai go bun anga den baala a Tesalonika.

Timotiyesi wooko omen yali anga Pawlesi. Pawlesi sikiifi wan leisi taki Timotiyesi na a moo bun sama di a be sa sende fu go yeepi den baala anga sisa. Timotiyesi lobi Yehofa. A lobi taa sama tu.

A so iseefi lobi taa sama? Yu á wani yeepi den fu kon sabi Yehofa noh?— Efi i lobi den, yu o piisii aini a libi enke Timotiyesi!