Lobi baala anga sisa:

A fu di u lobi Gadu anga taa sama meke ‘we go a sama fu ala kondee fu yeepi den fu toon Yesesi bakaman’ (Mat. 28:19, 20; Malik. 12:28-31). Te we soi tuutuu taki u lobi taa sama, da a sani ya o yeepi u fu doo den ati fu den ‘sama di wani fende a teego libi’.​—Toli 13:48.

Aini a ten di pasa, u be e leli takimakandaa a ede. Gaanse leisi u be e fika buku gi sama tu. Ma nownow wi abi fu du ala saw man fu gi sama leli di o doo den ati. U mu meke moiti fu soi den sama taki u lobi den. Wan fasi faw sa du a sani ya, a te we taki anga den fu sani di e hali den pakisei. A sani ya wani taki u mu meke moiti fu sabi sowtu booko-ede a sama abi, anga saw sa taki fu doo en ati. Fa a buku ya o yeepi u fu du a sani ya?

A buku ya abi 12 toli di e taki fu wantu manii di wi abi fanowdu fu soi taawan taki u lobi den. Den manii ya o yeepi u tu fu yeepi sama fu toon Yesesi bakaman. Ala den toli aini a buku ya e taki fu den manii di Yesesi, efuso wan fu den bakaman fi en be soi aini a peleikiwooko. A buku ya a ná fu yeepi u fu bigin wan takimakandaa namo, ma aw yeepi u fu sabi faw sa soi sama taki u lobi den tu. Wi abi ala den manii fu Yehofa fanowdu fu man du a peleikiwooko. Ma a buku ya o soi u san a wantu manii di wi abi fanowdu fu man bigin wan takimakandaa, fu tyai wan gobaka, anga fu holi wan Beibelsutudi.

Te yo luku den toli ya, pakisei fai sa soi den manii ya te yo taki anga den sama na a pisi pe ye peleiki. U mu du ala saw man fu soi lobi gi Yehofa anga taa sama. Winsi u koni efuso u sabi omen sani, toku a moo pelensipali sani di o yeepi u fu meke sama toon Yesesi bakaman, a te we meke moiti fu soi lobi.

Ai bigi giw taki wi abi a gaandi fu wooko makandii anga i (Sef. 3:9). Meke Yehofa belesi a moiti di ye meke fu lobi taa sama anga fu yeepi den fu toon Yesesi bakaman.