1. San sama mu du aini a ten ya, te abi fu du anga a dini fu Gadu?

YESESI be taki: „A sama di á de anga mi, e buuse mi” (Mateyesi 12:30). Dati wani taki, efu wi á de na a se fu Yehofa, da na a se fu Saatan u de. Fuu sama e denki taki de e dini Gadu na a soifili fasi, ma Beibel taki Saatan „e koli sama a hii goontapu” (Kon A Kiin 12:9). Miliyunmiliyun sama e denki taki a Gadu de e dini, ma fu taki enke fa a de, da a Saatan Didibii de e dini! Tide na a dei, sama mu denki luku san den o du: Den mu luku sama den o dini, Yehofa, „a Gadu fu a tuu,” efuso Saatan, „a tata fu lei.”​—Pisalon 31:5; Yohanisi 8:44.

2. San a wan fasi fa Saatan e puubei fu tapu sama fu dini Yehofa?

² A wan koni sani u du fu dini Yehofa, bika a sani de e meke Gadu fende u bun. Ma Saatan nái piisii anga den sama di e dini Gadu. Ai meke den kisi polobelema. Wan fasi fa Saatan e du a sani de, a fu meke famiiman anga mati wisiwasi u, efuso du ogii anga u. Yesesi be wasikoi u taki: „Eeye, den feyanti fu wan sama, o de en eigi famii seefi.”​—Mateyesi 10:36.

3. Efu den famii efuso den mati fi i wani tapu i fu dini Gadu, da san yu o du?

³ San yu o du efu a sowtu sani ya miti i? Fuu sama sabi taki a fasi fa de e dini Gadu fowtu, tokuso de e daai daai fu dini Gadu enke fa a mu de. De e si enke den  daai baka gi den famii te den o du a sani ya. Ma a so a de tuu? Efi i kon sabi taki koosube famiiman fi i e koboloiki takuu tabaka, yu á be o wasikoi den taki a sani de sa poli den libi noh? Yu á be o koboloiki a takuu tabaka ya makandii anga den, na so noh?

4. San Yowsuwa be taigi den Islayeli sama fu a fasi fa den be e dini Gadu aini a ten fi en?

⁴ Yowsuwa be gi den Islayelisama deki-ati fu fika den sani fu falisi biibi di den gaansama fu den be e du. A be taki: „Neen ede meke u mu feele Yehofa, dini en anga wan kiin ati anga leti fasi. Puu den gadu di den afo fu u be e dini na a taa se fu a Gaan Liba, anga di den be de aini Egepte, da u dini Yehofa” (Yowsuwa 24:14). Yowsuwa be tan dini Gadu, neen Yehofa belesi en. Yehofa o belesi u, efu u tan dini en.​—2 Samuweli 22:26.

5. Saide meke u mu towe ala bonu sani fiya di wi abi?

⁵ Fu komoto aini falisi biibi wani taki tu taki u mu towe ala bonu sani di wi abi. Sani enke keti, linga, bui anga taa sani di u bonu anga den. Te u du a sani ya, da wi e soi taki wi e fitoow a Yehofa.

6. San den Kelesten fu fositen be du anga den bonu buku fu den?

⁶ Luku san wan tu Kelesten fu fositen be du di den teke a tuu biibi. Beibel taki: „Fuu sama di be e bonu, tyai den buku fu den kon dyunta boon a lanti fesi.”​—Apaiti 19:19.

7. San u mu du efu den ogii yeye e fooseli u?

⁷ Efu wan sama be e bonu fosi a bigin dini Yehofa, da a kan taki den ogii yeye e fooseli en ete. Efu a sani de pasa anga i, da kai Yehofa taanga aini begi. Kai en nen, da a o yeepi i.​—Odoo 18:10; Yakowbesi 4:7.

8. Fa Kelesten e denki fu pobiki anga taa sani di sama e koboloiki aini falisi keliki?

⁸ Den sama di wani dini Yehofa á mu abi pobiki efuso taa sani di sama e koboloiki aini falisi keliki. Yu á mu koboloiki den tu. Tuu Kelesten „e waka anga biibi, ná anga san den ain e si” (2 Kolenti 5:7). De e lesipeki a weiti fu Gadu di e taki wi á mu dini pobiki anga taa sani.​—Ekisodesi 20:4, 5.

9. Sowtu lai Beibel e gi sama di wani kon koni?

⁹ Beibel e taki: „A sama di e waka anga koniman o kon koni, ma sani ná o go bun anga a sama di e waka anga don sama” (Odoo 13:20). Efu u wani toon koni sama da u mu teke paa anga den Yehofa Kotoigi. A den a den sama di e waka na a pasi di e tyai sama go a tego libi.​—Mateyesi 7:14.

10. Fa den Yehofa Kotoigi o yeepi i fu dini Gadu?

¹⁰ Den Kotoigi tuutuu e booko den ede anga taa sama. A wooko di de e du, a fu yeepi bun ati sama fu fusutan san Beibel e leli tuutuu, fu den sa kisi tego libi. Den sa yeepi i fu di den o sutudeli Beibel anga i sondee fi i pai. Den o piki den akisi fi i, da den o soi i tu fa i sa wooko anga den sani di yu e leli.​—Yohanisi 17:3.

11. Fa den Kelesten komakandaa o yeepi i?

¹¹ Yu o leli moo fu Gadu a den komakandaa peesi pe Kotoigi gwenti kon a makandii. A sani ya o meke i angii moo fu dini Gadu na a fasi di a wani. Den o leli i tu fa i sa yeepi taawan fu den kon sabi den tuu sani di de aini Beibel.​—Hebelei 10:24, 25.

12. Fa begi kan yeepi i fu dini Gadu?

¹² O moo yu o kon sabi den sani di Yehofa wani i du anga den sani di A abi a pakisei fu du, o moo dati o meke i lobi a fasi fa a de. Wan taa sani a taki yu o wani  piisii Yehofa tuutuu, anga i ná o wani du sani di a nái fende bun. Holi a pakisei taki i sa taki anga Yehofa aini begi, fu akisi en fu yeepi i fu du san bun anga fu koti pasi gi sani di á bun.​—1 Kolenti 6:9, 10; Filipense 4:6.

13. Fa i sa meke Yehofa ati piisii?

¹³ Te yu anga Gadu o toon moo bun mati, da yu o kisi a fii fu toon wan dopu Yehofa Kotoigi. A toon di yu o toon wan sama fu a foluku fu Yehofa o meke en ati piisii (Odoo 27:11). Yu o de a mindii den piisii sama di Gadu e taki fu den taki: „Mi o tan a den mindii anga mi o waka a den mindii. Mi o de a Gadu fu den, da den o de mi foluku.”​—2 Kolenti 6:16.