PISI 1
Na ala keliki e leli sama tuu sani?
1. San a wantu fu den keliki di de aini Afiikankondee?
PIKINMOO ala sama na Afiikan e si taki a de fanowdu fu dini Gadu. Ma den nái agii anga denseefi fu a fasi fa den mu dini Gadu. Sowan fu de e dini en aini wan moskee *, taawan e go a wan santa peesi fu dini Gadu. Taawan baka e go a keliki fu dini en. Ma a ná den dii biibi ya namo de na Afiikan. A ná ala Moslim sama e biibi aseefi sani, bika den weiti fu den anga den sani di de e biibi a ná aseefi. Taawan baka e biibi aini den gaansama sani fu den. Da wi á taki ete fu a kai di den Kelesten keliki nái kai na a wan. Boiti den gaanwan ya, da yu abi dunsudunsu taa pikin keliki aini Afiikankondee.
A biibi fu u mu e leli sama sani di tuu
2. (a) San e meke taki wan sama e go aini wan biibi? (b) Sowtu sani nái soi ete taki Gadu e fende a biibi fu u bun?
2 Saide meke son sama e de aini wan biibi? Gaanse fu den sama teke a biibi fu den gaansama fu den. Son sani di be pasa aini hawten meke son sama go aini wan keliki. Wan buku taki: „A Islam biibi paati go na a opuse fu a Sahara (wan gaan sabana aini Afiikan) fu di den sama fu a Islam biibi, feti anga den sama de, neen den teke den tanpeesi de abaa, . . . Na aseefi fasi a Kelesten biibi paati go na bilose fu a Sahara tu. A wan enkii sani di kengi, a taki a Islam biibi koboloiki fetihow fu meke den sama fu opuse teke a biibi fu den, ma den sama fu a Kelesten biibi koboloiki goni fu meke den sama fu bilose teke a biibi fu den.” (The Africans—A Triple Heritage) Tokuso gaanse fu wi e biibi taki Gadu e fende a biibi fu u bun. Ma ná fu di den gaansama fu wi de aini wan biibi, efuso fu di taa kondee sama dwengi den afo fu wi fu teke a biibi fu den, da a biibi de bun.
3-5. Sowtu toli e yeepi u fu fusutan taki a ná ala keliki e leli tuu sani?
3 Winsi fa ala den keliki e taki de e leli sama soifili fa fu dini Gadu, tokuso náwan fu de e go na a wanse. Den sani di de e leli sama fu Gadu, enke sama neen anga fa a wani fu u libi, nái kai na a wan. Pakisei a toli ya luku: Kon meke u taki i fende wooko a wan gaan fabiliki. A fosi dei di i go na a wooko, neen i yee taki a basi á de a wooko. Neen i akisi dii taa wookoman on sowtu wooko i mu du. A fosi wookoman taigi i taki a basi wani fi i sibi a wooko peesi. A di fu tu taigi i taki i mu felifi a wooko peesi. A di fu dii taigi i taki i mu tyai biifi paati gi den wookoman.
4 Bakadati, neen i akisi den wookoman fu den taigi i sama na a basi. A fosiwan taigi i taki a basi langa, a yonkuu anga a ogii. A di fu tu taki a basi satu, a gaandi anga a abi bun manii. A di fu dii taigi i taki a basi a ná wan manengee seefi, ma a wan umansama. Yu o fusutan taki a ná ala den dii wookoman abi leti. Ma efi yu á wani lasi a wooko fi i, dan iseefi mu meke moiti fu kon sabi sama na a basi tuutuu anga san a wani fi i mu du.
5 A so a de anga den keliki tu. Fu di sama abi somen pakisei fu sama a Gadu anga san a wani fu u du, meke a de fanowdu taki wi e keli luku efu wi e dini Gadu na a soifili fasi. Ma fa wi o du man sabi efu wi e dini Gadu na a soifili fasi?
^ paragraaf 1 A peesi pe den moslimsama e go dini den gadu fu den.
