1, 2. Sowtu toli e soi taki wi abi wan sani fanowdu di mu yeepi u fu sabi sowtu biibi e leli sama tuu sani fu Gadu?

FA U sa kon leli sabi Gadu? A de fanowdu fu go ondoosuku den leli fu den somen keliki di de? Yu á be o poi du a sani de. Winsi u be o poi seefi, tokuso fa u be o man sabi sowtu leli na a tuu wan?

² Fu di sama abi ala sowtu denki fu Gadu, meke ala wi abi wan sani fanowdu di poi leli u a tuu. A mu de wan maiki tiki di sama man fitoow. Kon u taki tu sama de a wowoyo e sitee anga denseefi fu o langa wan pisi koosi de. A seliman taki a koosi a dii meiti a de, ma a sama di wani bai en taki a ná tuu, a koosi á langa so. Fa den o sabi soifili o langa a koosi de tuutuu? A te den maiki en anga wan maiki tiki.

3. Fu san ede Gadu meke sama sikiifi Beibel?

³ Wan maiki tiki de di u sa koboloiki fu sabi sowtu biibi e leli sama tuu sani fu Gadu? Eeye, dati na a Beibel. Gadu meke sama sikiifi a Beibel fu sama na ala se sa kon sabi den tuu toli fi en. A omen tenti miliyun Beibel sama doloki. Den sikiifi a Beibel efuso son pisi fi en aini moo enke 2100 tongo. Neen ede meke beina ala sama sa leisi den tuu toli fu Gadu aini den mama bee tongo.

4. Sowtu toli i sa fende aini a Beibel?

⁴ A Beibel a wan gaan dii kado di Gadu gi u. Noiti u be o sabi son sani efu a ná Beibel be taigi u den sani de. Beibel e taigi wi sama a den yeye. Ai meke u kon sabi den pakisei fu Gadu, den manii fi en, anga den sani di a abi a pakisei fu du. Beibel  e soi u fa Gadu libi anga sama aini den dunsudunsu yali di pasa. Ai taigi u den sani di o pasa aini a ten di e kon. Ai meke u kon sabi tu fa u sa fende a pasi di e tyai sama go a tego libi.

5. Sowtu toli e soi taki Beibel e kai anga sani di ondoosukuman kon sabi?

⁵ Fuu sani de saide meke wi e biibi taki a Beibel na a Wowtu fu Gadu tuutuu. Wan fu den sani de, a taki Beibel e kai anga den sani di koniman ondoosuku. Aini hawten fuu sama be e pakisei taki a wan sani e holi a goontapu. Aini a West pisi fu Afiikankondee, sama be e biibi fosi taki, wan sineki lolo enseefi 3500 leisi a ondoose fu a goontapu, anga 3500 leisi a tapuse fu a goontapu. Ma moo enke 3500 yali pasa kaa wan fu den man di be sikiifi Beibel be sikiifi wan sani di e kai anga san koniman seefi kon sabi, taki Gadu „á lenge lenge goontapu a wan sani.”​—Yopu 26:7.

6. San na a moo gaan sani di e soi taki a Gadu a Beibel komoto?

⁶ A moo gaan sani di e soi taki a Beibel komoto a Gadu tuutuu, a fu di ai taki finifini a fesi fu sani di o pasa. Libisama lukuman anga Gadu a ná aseefi, bika Gadu sabi soifili fa sani o waka aini a ten di e kon; ala sani di a taki e pasa letiso.

7. San a wan tu sani di pasa aini hawten, di Beibel be taki fu den a fesi?

⁷ Ondoo ondoo Beibel toli be taki a fesi, di kon tuu aini den ten di pasa. Seibi ondoo yali fosi Yesesi be meke, da Beibel be taki finifini a fesi taki aini Betelehem foto a be o meke. A sani de be pasa so tuu (Mika 5:2; Mateyesi 2:3-9). Boiti den taa toli di be taki a fesi fu Yesesi, da Beibel be taki tu taki a wan uman di á be didon anga man ete be o meke en. Bakadati sama be o seli en 30 pisi solufu moni. Ala den toli ya di Beibel be taki a fesi, pasa tuu. Náwan libisama be o poi taki sani a fesi so!​—Yesaya 7:14; Sakaliya 11:12, 13; Mateyesi 1:22, 23; 27:3-5.

8. Sowtu Beibel toli di be taki a fesi e pasa aini a ten ya, anga san den sani ya e soi u?

⁸ Tyaipi Beibel toli di be taki a fesi e pasa aini a ten ya. Luku wan tu fu den ya:

• „A wan nasi o opo feti anga wan taa nasi, anga a wan kownukondee o opo feti anga wan taa kownukondee. A doti o go e  seke piiti a goontapu. Takuu siki o go e kii somen sama anga nyanyan angii o de a omen peesi.”​—Lukasi 21:10, 11.

• „Kukutu libi seefi be o lai.”​—Mateyesi 24:12.

• „Aini den kiiboi dei . . . sama a soso denseefi namo den o lobi. Den o lobi moni. . . . Pikin o go e taanga yesi den gaansama fu den. . . . Den ná o poi dwengi denseefi. Den o go e de ogii ogii ala yuu. Den ná o lobi sani di bun. . . . Den o go e fii enke den hei moo taawan. Den o lobi meke piisii moo enke den lobi Gadu.”​—2 Timotiyesi 3:1-5.

Iseefi nái si taki den sani ya e pasa tuu noh? Fu di Beibel be taki soifili a fesi san be o pasa, anga fu di den sani ya e pasa letiso, meke wi e biibi taki Beibel a náwan buku di libisama sikiifi. Beibel na a Wowtu fu Gadu!​—2 Timotiyesi 3:16.

9, 10. Sowtu sani e soi taki Gadu á meke sama kengi den sani di sikiifi aini Beibel?

⁹ Kon u taki yu a basi fu wan wookope, da i sikiifi wantu weiti gi den wookoman fi i. Efu wan feyantiman kon kengi den weiti di i sikiifi, da san i be o du? Yu á be o seeka den sani baka di a be kengi noh? A so a de tu anga Gadu. A ná o meke sama kengi den tuu sani di sikiifi aini en Wowtu Beibel.

¹⁰ Den sama di be meke moiti fu kengi den sani di sikiifi aini Gadu Wowtu á be abi bun bakapisi. Te u teke a Beibel gei anga den haw wan di be sikiifi a fositen, da wi e si taki na aseefi. A sani ya e soi taki den sani di sikiifi aini Beibel á kengi seefi seefi aini den somen yali di pasa.