1, 2. Sowtu sani fuu sama e biibi fu dedesama?

MILIYUNMILIYUN sama aini Afiikan e biibi taki dede a ná a kaba fu a libi fu wan sama. Den e biibi taki te wan sama dede da ai kengi, efuso ai go libi a wan taa peesi. Somen sama e biibi taki den afo fu den di dede, e komoto aini a goontapu di u de aini ya, go aini wan taawan di wi á poi si anga ain. Dati wani taki de e komoto aini a goontapu fu libisama, fu go na a wan fu den yeye.

² Son sama e biibi taki den afo efuso den yeye fu den afo fu den, e kiibi den famii fu den di e libi a goontapu ya, den e yeepi den tu fu sani waka den bun. Neen ede sama e si den yeye fu den afo fu den enke mati fu den di abi tyaipi makiti. Den e biibi taki a den afo e meke den goon fu den e gi tyaipi nyanyan, e yeepi den fu tan gusontu, anga e kibii den gi ogii. Fuu sama e biibi taki, efu den á de a den afo fu den bali efuso den e meke den atiboon, da den afo sa du ogii anga den. Den sa meke den siki, pina, efuso du taa ogii anga den.

3. Fa son sama e gi gaandi a den afo fu den?

³ Den libiwan e du sani fu gi den yeye fu den afo fu den gaandi, anga fu meke den afo fende den bun. Den gwenti du den sowtu sani ya te wan sama dede. Sani enke towe dii dei wataa anga dii mun wataa. Ma sama e gi gaandi a den afo a wan tu taa fasi tu. Fosi son sama diingi sopi da den e towe pikinso a doti gi den afo fu den. Baka te den boli nyanyan da de e fika pikinso aini a patu gi den afo, fu den sa fende wan sani fu nyan.

4. San fuu sama e biibi taki na a yeye?

⁴ Sama e biibi tu taki wan libisama abi wan yeye (akaa) di e libi go doo baka te den dede. Den e taki efu wan sama libi wan bun libi, da a yeye fi en o go a hemel efuso a paladeisi, ma efu wan sama á libi bun, da a yeye fi en o go boon aini wan gaan faya de e kai hel. Son leisi sama e mokisa a keliki leli ya anga a biibi fu den afo fu den. Bika son leisi te dede bosikopu fu kelikisama e bali a laadiyow, da de e taki: „A dedewan go a dedekondee” efuso „den afo fi en sende kai en.” Sama e gi den sowtu bosikopu ya fu di de e biibi taki wan sama abi wan yeye di e libi go doo baka te a dede. Ma san a Beibel e taki fu a pisi toli ya?

5. Enke fa Beibel e soi, da san a wowtu yeye wani taki?

⁵ A Hebelei wowtu anga a Giiki wowtu fu yeye wani taki somen sani. Ala yuu a wani taki wan sani di wi á poi si anga ain, efuso wan kaakiti di e du sani. A yeye wani taki: (1) winta (2) a kaakiti di de aini libisama anga meti (3) a denki di wan sama abi, di e meke ai taki anga e libi a wan fasi. (4) engel  (5) a kaakiti fu Gadu efuso a santa yeye. Te i leisi a wowtu yeye aini a Beibel, da a den sani ya a kan wani taki.

6. San na a yeye di de aini libisama?

⁶ Te Beibel e taki wan yeye de aini u, da a sani de e soi go na a kaakiti di wi á poi si, a kaakiti di e meke u poi du wooko. A yeye de enke sitolomu. A sitolomu e meke wan tv anga wan wasimasini e daai. A tv anga a wasimasini á poi wooko sondee a sitolomu. A so a yeye di wi abi de tu. Neen e meke wi si, yee, anga pakisei sani. Ma a yeye wawan too á poi si, yee, anga denki sondee a sikin fu u.

7. Sai pasa te a yeye á de aini a sikin fu wan libisama moo?

⁷ Ala libisama abi wan kaakiti efuso wan yeye di e meke a poi libi. Wi e fende a kaakiti ya te wi e hali boo. A kaakiti ya de aini ibii pikinpikin pisi fuu sikin. Te a kaakiti ya kaba aini a sikin, da u boo e koti. Neen ede meke a Beibel e taki: „Wan sikin di ná abi wan yeye, dede.”​—Yakowbesi 2:26.

8. San e pasa anga den pakisei fu wan sama te a dede?

⁸ A Beibel e leli u tu taki, te wan libisama dede dan a ná a sikin fi en wawan e dede. Aini Pisalon 146:4 wi e leisi taki, te wan sama dede da a „yeye fi en á de moo.” Dati wani taki a kaakiti aini en nái wooko moo. „A sama e toon doti baka.” A sikin fi en e daai go na a doti baka. A tekisi e soi wi tu taki: „Fanafu a dei de, den pakisei fi en e lasi gwe.”

9. Sowtu sani a yeye á poi du?

⁹ Enke fa a Beibel e soi, da a yeye efuso a kaakiti di de aini wi sikin, nái komoto aini u sikin fu libi go doo baka te u dede. A kaakiti de á poi du wan sani te u dede. A á poi du bun gi u, a á poi meke u feele efuso du ogii anga u tu.

10. San Beibel e taki e pasa anga wan sama baka te a dede?

¹⁰ San e pasa anga wan sama te a dede? Fu di a Yehofa meke libisama, meke neen sabi san e pasa anga u te u dede. A Wowtu fi en e leli u taki den dedewan nái libi, yee, si, taki efuso denki moo. A Beibel e taki:

• „Den dedewan . . . á sabi náwan libi sani.”​—Peleikiman 9:5.

• „A lobi, a atiboon, anga a dyalusu fu den, á de moo.”​—Peleikiman 9:6.

• „Náwan wooko, náwan pakisei efuso koni de aini a geebi, a peesi pe yu o go.”​—Peleikiman 9:10.

11. San Yehofa be taigi Adan baka di a sondu?

¹¹ Pakisei a sani di Beibel e taki fu a afo fu wi, Adan. Yehofa meke Adan „anga doti fu a goontapu” (Kenesesi 2:7). Efu Adan be aliki den weiti fu Yehofa, da fu tego a be o libi koloku a goontapu yaaso. Ma Adan be taangayesi den weiti fu Yehofa neen a kisi dede enke sitaafu. Pe Adan go di a dede? Gadu be taigi en: „Yu o daai go baka na a doti pe mi be teke yu puu. Bika a doti mi be teke meke yu, da a doti yu o toon baka.”​—Kenesesi 3:19.

12. San pasa anga Adan di a dede?

¹² Pe Adan be de fosi Yehofa be teke doti meke en? Adan á be de a náwan peesi. Náwan sani fi en be de. Neen ede meke di Yehofa be taigi Adan taki a be o ’toon doti baka’, da anga dati A be wani taki Adan be o de sondee libi baka leti enke doti. Adan á be go libi a yeye kondee. A á be go a wan peesi pe den yeye fu den afo de. A á be go a hemel efu hel. A be toon wan sani baka di ná abi libi, a á be de moo.

13. San e pasa anga libisama anga den meti te den dede?

¹³ Na a seefi sani ya e pasa anga ala taa sama te den dede? Eeye. Beibel e taki: „[Libisama anga meti] e go na a wan peesi. A doti den be teke puu, da a doti den o toon baka.”​—Peleikiman 3:19, 20.

14. Sowtu howpu de gi den dedesama?

¹⁴ Beibel e paamisi taki Gadu o meke den dedesama kon a libi baka aini wan  Paladeisi a goontapu ya (Yohanisi 5:28, 29; Apaiti 24:15). Ma a ten de a doo ete. Nownow ya a de enke den dedewan e siibi (Yohanisi 11:11-14). Wi á mu feele den, efuso dini den, bika den á man yeepi u efuso du ogii anga wi.

15, 16. Fa Saatan e puubei fu koli sama taki den dedesama á dede tuutuu?

¹⁵ A denki di sama e denki taki wi nái dede tuutuu, a wan lei di Saatan Didibii paati na ala peesi. Fu di a wani sama biibi a lei ya, da en anga den takuu yeye fi en e meke sama denki taki a den yeye fu den dedesama e meke wi e siki anga a den e meke wi abi taa polobelema tu. A tuu taki a den ogii yeye e tyai son polobelema kon gi libisama. Ma a ná ala den polobelema di e miti u e kon fu ogii yeye. A ná den dedesama e du ogii anga u tu.

¹⁶ Wan taa fasi de tu, fa den ogii yeye e meke sama e denki taki Beibel nái leli soifili san e pasa anga den dedesama. Den e koli sama taki den poi si efuso taki anga den dedewan. Den e koboloiki deen anga bonuman efuso taa sani fu du a sani ya. Te sama e taki den si efuso den taki anga den dedesama da a ná den dedewan den si, ma a den ogii yeye di e du enke den na dedesama. Neen ede meke Yehofa e soi kiinkiin taki a o sitaafu den sama di e wooko gi den ogii yeye anga den sama di e go suku fu sabi sani a den dedesama.​—Deitolonomi 18:10-12; Sakaliya 10:2.