1. San wi mu du fu piisii Gadu?

EFU u wani de wan tuutuu mati fu Gadu, da wi á mu abi noti fu du anga falisi keliki. U mu e du den sani di a tuu biibi e leli u. A omen tenti miliyun sama a hii goontapu e du a sani ya aini a ten ya.

2. Pe u sa fende den Yehofa Kotoigi, anga sowtu wooko de e du?

² Enke fa Beibel be soi a fesi, da den tuu diniman fu Gadu a „wan gaan kulu sama” di „komoto na ala sowtu nasi, lo, foluku anga tongo fu goontapu” (Kon A Kiin 7:9). Aini 235 kondee miliyunmiliyun Yehofa Kotoigi e yeepi sama fayafaya fu kon sabi a lobi ati fasi fa Yehofa e libi anga sama, anga fa a wani u mu libi.

3. Sama den Kotoigi e dini, anga san den nái dini?

³ Den Yehofa Kotoigi sabi kiinkiin taki a Yehofa wawan libisama mu dini. Neen ede meke den nái saka kini dini pobiki efuso taa sani (1 Yohanisi 5:21). Den nái gi gaandi a den dedewan, a so meke den nái holi bookode, efuso du taa sani fu holi baka gi falisi biibi, anga den „leli fu den ogii yeye” (1 Timotiyesi 4:1). Ma tokuso de e tolowsutu den sama di lasi wan lobiwan aini dede, fu di de e soi den taki Gadu paamisi fu weki den dedewan kon a libi baka, aini a paladeisi.​—Yohanisi 5:28, 29; Apaiti 24:15.

4. Fa den diniman fu Gadu e si tofuu anga bonu?

⁴ Den Kotoigi nái mumui anga tofuu efuso bonu, bika den sani de komoto a Didibii. Den nái poti den fitoow aini bonu, fu fende kibii. Ma a Yehofa de e poti den fitoow.​—Odoo 18:10.

5. Na on sowtu fasi Yehofa Kotoigi nái „teke paa anga a goontapu” ya?

⁵ Yesesi be taki den bakaman fi en á be o „teke paa anga a goontapu” (Yohanisi 17:16). Yesesi seefi á be wani mumui anga politiki di a be de a goontapu ya (Yohanisi 6:15). Den Kotoigi seefi nái mumui anga politiki, den nái fii taki a den sama fu a kondee fu den, a den moo bunbun sama di de. Den nái suku fu kisi balinen tu aini a goontapu ya. Ma tokuso de e pai lanti moni, anga de e wooko anga den weiti fu a kondee fu den.​—Yohanisi 15:19; Lomeini 13:1, 7.

6. Anga sowtu weiti den diniman fu Gadu e wooko aini a toli fu toow anga booko toow?

⁶ Fu di den Kotoigi e wooko anga den weiti fu lanti, meke de e toow enke fa a weiti fu lanti taki (Titesi 3:1). De e holi denseefi a den weiti fu Gadu neen ede meke de e toow anga wan kodo sama namo (1 Timotiyesi 3:2). Fu di den diniman fu Gadu e wooko anga den leli fi en, meke den nái booko toow makiliki.

7. Fa den Kotoigi e soi lobi gi makandii?

⁷ Den Kotoigi lobi makandaa. A lobi de, anga a lobi di den abi gi Gadu e meke de e libi na a wan enke baala anga sisa, awinsi fa den na fu ala sowtu nasi anga kondee. Te wan ogii pasa aini wan kondee da gawgaw den kotoigi e yeepi makandii. Den kotoigi e soi lobi anga a fasi fa de e libi.​—Yohanisi 13:35.

8. Sowtu sani den diniman fu Gadu e wai pasi gi?

⁸ Yehofa Kotoigi e meke moiti fu libi a wan leti fasi. De e wai pasi gi fufuu, lei, hululibi, duungu, anga den nái bidiigi taawan anga moni. Den mansama nái fon den uman fu den. Sowan fu den be e du den sowtu sani ya fosi den toon Kotoigi, ma nownow Yehofa yeepi den fu tapu anga  den du de. Den „wasi kon kiin” aini Gadu ain.​—1 Kolenti 6:9-11.

9. San wan buku e taki fu den keliki, anga den gaansama gwenti aini Afiikan?

⁹ Enke fa wi e si, da somen keliki e taki den abi a tuu biibi. De e soi go a den kufaliki sani di den poi du. Aini Afiikan, wan buku di e taki fu keliki anga gaansama gwenti taki: „Tyaipi [nyun Kelesten] e bonu efuso du obiya. . . . De e si enke de e taki polofeititoli anga du wonduu. Den polofeiti aini den keliki ya e kisi deen. De e koboloiki santa wataa, oli, asisi, kandaa, anga de e boon sani di e sumee switi fu deesi sama efuso fu meke den á siki.

10, 11. Saide meke den wonduu di den keliki e du aini a ten ya, nái soi ete taki Gadu e fende den bun?

¹⁰ Den sama di de aini den keliki ya e biibi taki den wonduu di de e si aini a keliki fu den, a wan maiki taki Gadu e fende a keliki fu den bun. Saatan e gi den sama fu falisi keliki a kaakiti fu du „wonduu” (2 Tesalonika 2:9). Beibel e soi u taki den wonduu di Gadu e meke sama du enke fu taki polofeititoli, taki aini tongo, a sabi fu son sani „be o kon a wan kaba.”​—1 Kolenti 13:8.

¹¹ Yesesi be taki: „A ná ala sama di e taigi mi Masaa, Masaa, o go aini a Kownukondee fu hemel, ma a den sama di e du a wani fu mi Tata di de a hemel. Fuu sama o taigi mi na a dei de taki, Masaa, Masaa, wi á be taki polofeititoli aini nen noh? Wi á be puu ogii yeye aini i nen noh? Wi á be du somen kaakitiwooko aini i nen noh? Tokuso mi o taigi den taki: Mi á sabi u noiti wan dei! U komoto a mi fesi, u wookoman fu ogiidu.”​—Mateyesi 7:21-23.

12. Sama o go aini a Kownukondee fu hemel?

¹² Sama a den sama di o go aini a Kownukondee fu hemel? A den sama di e du a wani fu Yehofa.

13. San na a wooko di Gadu gi a foluku fi en, anga sama a den sama di e du en?

¹³ San Gadu wani den sama fi en aini a ten ya mu du? Yesesi taki: „A bun nyunsu fu a Kownukondee fu Gadu mu peleiki doo hii goontapu, dan fosi a kaba fu goontapu o kon” (Mateyesi 24:14). Na a wooko ya den Yehofa Kotoigi e paati fayafaya.

14. San na a Kownukondee fu Gadu, anga sama a den sama di o sidon enke kownu aini a Kownukondee ya?

¹⁴ A hii goontapu Yehofa Kotoigi e peleiki taki na a Kownukondee fu Gadu wawan too di de a hemel sa tii a goontapu ya a wan leti-fasi. Den e leli sama tu taki, Yehofa teke Yesesi fu de kownu fu a Kownukondee ya, makandaa anga ete 144.000 taa sama di teke puu a goontapu ya.​—Daniyeli 7:14, 18; Kon A Kiin 14:1, 4.

15. San a Kownukondee o poli?

¹⁵ Na a Beibel den Yehofa Kotoigi e koboloiki fu soi sama taki a Kownukondee fu Gadu o poli a hii goontapu fu Saatan. Náwan falisi biibi anga leli o de moo, di e poli Gadu nen anga di e gi gaandi a Saatan (Kon A Kiin 18:8). Den tiiman fu libisama di nái du sani enke fa Gadu wani ná o de moo tu!​—Daniyeli 2:44.

16. Sama a den sama di Yesesi o tii, anga pe den o tan?

¹⁶ Yehovah Kotoigi leli sama tu taki Yesesi o du tyaipi bun sani gi ala sama di e libi enke fa Gadu wani. Den a den sama di Yesesi o tii a goontapu. A Beibel e taki: „A o yeepi den pooti sama di e bali e suku yeepi, ala den mofinasama tu anga den wan di ná abi yeepiman. A o fii tyali gi den mofinasama anga den pootisama, da a o yeepi den pooti sama.”​—Pisalon 72:12, 13.

17. Sama a den wan enkii sama di e peleiki fu a Kownukondee fu Gadu?

¹⁷ Náwan taa guupu sama a goontapu e peleiki a Kownukondee nyunsu enke fa Gadu taki. A soso den Yehofa Kotoigi wawan too, e peleiki fu a Kownukondee fu Gadu a hii goontapu.