1. Fuu sama e biibi aini bonu anga wisi?

WAN buku e taki: „Aini Afiikankondee sama be o si i enke donman, efi i akisi efu bonu a wan sani di de tuutuu.” Ai taki tu taki: „iniiwan Afiikansama, e biibi taki bonu a wan sani di de taanga fanowdu” (African Traditional Religion). Awinsi wan sama á go a sikoo, efuso awinsi a kisi hei sikoo, toku ai biibi aini bonu anga wisi. Den fesiman fu den Islam keliki anga den Kelesten keliki e biibi aini den sani ya tu.

2. Pe a kaakiti fu man bonu e komoto enke fa fuu sama e denki?

² Fuu sama aini Afiikankondee e biibi taki wan kaakiti de lontu u, di wi á poi fusutan. Den e taki a Gadu abi a kaakiti ya. Ogii yeye anga den afo fu u poi koboloiki a kaakiti de. Son sama sabi san den mu du fu fende a kaakiti ya, anga de e koboloiki en fu du bun efuso ogii.

3. San na wisi, anga fa sama e koboloiki en?

³ Sama e meke wisi fu du ogii anga feyantiman. Enke fa somen sama e biibi, da wisiman abi a makiti fu sende takuu foo, sineki, anga taa meti fu du ogii anga sama. A somen peesi sama e biibi taki a wisi e meke taki sama feti anga taawan, ai meke den á poi meke pikin, ai siki den anga ai kii den.

4. San fuu sama e biibi fu den wisiman, anga san sowan fu den sama di be e wisi fosi taki?

⁴ Den taki te neti, da wisiman e gwe fika a sikin fu den, da de e fee a tapu go miti den taa wisiman fu go diingi sama. Ma a sikin fu den e tan a siibipe, neen ede meke gaanse leisi a den sama di e taki den be e du den sani ya fosi, e gi den toli ya. Wan Afiikan buku sikiifi san somen sama di be e wisi fosi taki (gaanse fu den a yonkuu umanpikin). Den taki: „Mi kii 150 sama fu di mi meke den meke ongooku anga wagi efuso bolomu.” „Mi kii feifi pikin, bika mi soigi den buulu te enke den kon dee.” „A dii man di mi anga den be e libi, mi kii, bika den be towe mi.”

5. Saide meke son sama e bonu, anga san den sama ya gwenti e du?

⁵ Sama e taki son fasi fu bonu bun bika de e kibii sama fu ogii á miti den. Sama di e bonu fu kibii denseefi fu ogii a miti  den, gwenti wei bonu linga anga bui. Den e meke obiya bataa e diingi, efuso de e meke en lobi a sikin. Den e kibii sani aini den osu efuso a ondoo doti, bika de e biibi taki den sani ya sa kibii den fu ogii á miti den. Den e sikiifi tekisi fu a Koran efuso a Beibel poti aini sani di de e wei a den sikin enke wan tapu.

6. San Saatan anga den ogii yeye fi en du aini den ten di pasa, anga fa wi mu si a makiti di den abi?

⁶ Saatan anga den ogii yeye fi en a ogii-ati feyanti fu libisama. Den man abi kaakiti a libisama fusutan anga a libi fu den. Aini den ten di pasa, den ogii yeye ya be e go a libisama anga meti tapu, da den be e meke den du san den wani (Mateyesi 12:43-45). Wi á mu si a makiti fu den enke wan soso sani, ma wi á mu si enke den abi makiti pasa peesi tu.

7. Sowtu sani Saatan wani fu u biibi? Gi wan toli di e soi a sani ya.

⁷ Saatan a basi fu bidiigi sama. Ai koli sama fu abi a denki taki ná pikin makiti a abi. Aini wan feti di be feti aini wan Afiikan kondee wan ten pasa anda, da den suudati be koboloiki kasette lolo anga bokusu fu meke den feyanti fu den feele. Fosi den go na a feti, den pee den kasette lolo ya pe i be e yee fa omen sowtu kufaliki bom anga goni e sutu. Den be wani den feyanti fu den pakisei taki den be de anga tyaipi suudati anga gaan kufaliki fetisani. A so Saatan seefi wani sama biibi taki a makiti fi en bigi pasa maiki. Ai du a sani ya, bika a wani sama mu feele en fu du san a wani, a peesi fu den du san Yehofa wani. Meke u go luku dii sowtu lei di Saatan wani sama mu biibi.

8. San a wan fu den lei di Saatan e paati?

⁸ Disi a wan fu den lei di Saatan e paati: Náwan ogii e pasa soso kaali; efu a ná wan sama du en anga i, da a wan sama wisi i. Meke u taki malaliya kii wan pikin. Sonten en mma sabi taki a masikita e paati a siki ya. Ma kande ai biibi tu taki a sama wisi a pikin fi en anga masikita.

9. Fa Beibel e soi taki a ná ala ogii di e pasa na Saatan e du?

⁹ Aladi Saatan abi a makiti fu meke son polobelema pasa, tokuso a á be o bun fu denki taki ala den polobelema di e miti u a Saatan den komoto. Beibel taki: „A ná den wan di gaw e wini a siteelon. A ná den taangawan e wini a feti, anga a ná den koniman abi a nyanyan. A ná den wan di abi fusutan abi den gudu. Soseefi a ná den wan di abi sabi sama e fende bun, bika ogii ten anga sani di den á poi si a fesi e miti ala den” (Peleikiman 9:11). Wan lonman aini wan siteelon sa gaw moo den taawan, ma dati á wani taki neen o wini. Son ’sani di a á poi si a fesi’ sa meke a lasi a siteelon ya. A sa dyakata kai kisi mankei. Den sani ya sa pasa anga iniiwan sama. A ná abi fu de so taki a Saatan du en, efuso sama wisi en. A so sani e pasa son leisi kaa.

10. (a) San sama e taki fu wisiman? (b) Fa u du sabi taki wisiman á poi gwe fika den sikin, anga yu e biibi a sani de?

¹⁰ Wan taa lei di Saatan e paati a taki: Te neti, da wisiman e gwe fika a sikin fu  den da de e fee go miti taa wisiman efuso de e go diingi sama. Akisi iseefi osi: ’Efu wisiman poi du a sani ya, da san na a sani di e komoto aini a sikin fu go du den sani de?’ Enke fa u be luku kaba, da libisama á be meke anga wan yeye di poi libi sondee a mama sikin. Wan yeye á de aini wi enke libisama di e gwe fika a sikin fu go du bun efuso ogii. Neen ede meke wisiman á poi gwe fika den sikin. Den á man du den sani tuutuu di de e taki den du efuso di den denki taki den du.

11. Fa Saatan e koli sama fu biibi taki den du sani di á pasa seefi seefi?

¹¹ Ma fa a de anga den toli fu den sama di be de bonuman efuso wisiman fosi? Saatan man meke sama biibi taki den be du sani di á pasa tuutuu seefi. Saatan poi meke sama si enke den si, yee, efuso du sani di á pasa tuutuu. A so a wani meke sama daai baka gi Yehofa, anga fu meke sama denki taki a Beibel e lei.

12. (a) A wan bun sani, efu wan sama e bonu fu ogii á miti en? (b) San a Beibel e taki fu bonu?

¹² A di fu dii lei na taki: A wan bun sani efu wan sama e bonu fu meke ogii á miti en. A Beibel nái soi taki wan fasi fu bonu de di bun. Ma ai kuutu ala den fasi fu bonu. Luku a weiti di Yehofa be gi den Islayelisama fu bonu anga den sama di e bonu:

• „Yu á mu bonu.”​—Lefitikesi 19:26.

• „Efu wan man efuso wan uman e wooko anga den ogii yeye, efuso ai du lukuman wooko, da u mu kii en.”​—Lefitikesi 20:27.

• „Náwan sama mu de a u mindii . . . di e du lukuman wooko, bonu, tofuu efuso wan sama di e suku maiki fu kon sabi san o pasa. Ná sama di e taki mofu fu wisi taawan. Efuso wan sama di e go suku lai a den sama di e wooko anga den ogii yeye.”​—Deitolonomi 18:10-14.

13. Saide meke Yehofa be meke weiti di e kuutu a bonu di sama e bonu?

 ¹³ Den weiti ya e soi kiin taki Gadu á wani den sama fi en du bonu wooko. Yehofa lobi den diniman fi en, neen ede meke a á wani meke de e feele ala yuu. A á wani fu de e waka anga fowtu denki tu. A du a sani ya bika a á be wani meke ogii yeye tyotyo den.

14. Fa Beibel e soi taki Yehofa taanga moo Saatan?

¹⁴ Beibel nái taki finifini fu san den ogii yeye poi du anga san den á poi du. Ma san ai soi wi a taki Yehofa taanga dobuu fu Saatan anga den ogii yeye fi en. Yehofa be meke den fiingi Saatan puu komoto a hemel (Kon A Kiin 12:9). Luku tu taki Saatan be akisi Gadu piimisi fu a be sa tesi Yopu, anga a be aliki Gadu tu di a be taigi en taki a á mu kii Yopu.​—Yopu 2:4-6.

15. A sama u mu suku kibii?

¹⁵ Odoo 18:10 e taki: „A nen fu Yehofa a wan bun kibii peesi. Na ape den sama di e gi yesi a Gadu e lon go, da de e fende kibii.” Neen ede meke a Yehofa na a sama di u mu go suku kibii. Den diniman fu Gadu nái go suku tapu efuso obiya bataa fu kibii den gi den ogii di Saatan anga den ogii yeye fi en e tyai kon a den. Den nái feele tu te wisiman efuso bonuman e taki mofu gi den. Den diniman fi en e biibi san a Beibel e taki, taki: „Tuutuu, den ain fu Yehofa e luku lontu a hii goontapu fu si sai pasa, fu a sa koboloiki en kaakiti fu yeepi den sama di e dini en anga den hii ati.”​—2 Koloniki 16:9.

16. San Yakowbesi 4:7 e taki, ma san wi mu du fosi?

¹⁶ I sa fende so wan kibii tu te yu e dini Yehofa. Yakowbesi 4:7 e taki: „Neen ede meke u mu saka useefi a Gadu ondoo, da toto futu gi Saatan, da a o lon gwe.” Efu yu e dini a tuu Gadu da yu e saka iseefi neen ondoo da i sa abi a fitoow taki a o kibii yu.